Хатас оскуолата РАН тирэх оскуолаларын кэккэтигэр
П.Н. уонна Н.Е. Самсоновтар ааттарынан Хатас орто оскуолата Арассыыйатааҕы билим академиятын тирэх оскуолата буоларын туоһулуур сэртипикээти Саха сирин агрооскуолаларыттан бастакынан тутта.
Муус устар 1-5 күннэригэр Уфаҕа XXIII норуоттар икки ардыларынааҕы Макаренковскай форум буолан ааста. Форумҥа Хатас орто оскуолатын дириэктэрэ Николай Слепцов научнай-чинчийэр лабораториялаах аныгы кэм агрошколатын уонна «Хатас агробиисинэс оскуолата» ТХПК туһунан кэпсээбитэ экспердэр биһирэбиллэрин ылла.
«Арассыыйатааҕы билим академиятын тирэх оскуолалара – бу Арассыыйа технологияҕа лидер быһыытынан сайдыытын бастакы үктэлэ буолар. Билими уонна аныгы технологияны сэҥээрэр талааннаах оҕолору оскуолалартан булан, регионнар инники күөҥҥэ сылдьар тэрилтэлэрин өйөбүлүнэн колледжтарга, үрдүк үөрэх кыһаларыгар бэлэмниэхтэрэ.
Дьокуускай куораттааҕы, В.П. Ларионов аатынан физика-тиэхиньиичэскэй лицейдэри сэргэ Дьокуускай куораттан Арассыыйатааҕы билим академиятын тирэх оскуолата аатын сүкпүт бу үһүс оскуола буоларын бэлиэтиир оруннаах», – диэн Дьокуускай куорат баһылыга Евгений Григорьев телеграм-ханаалыгар суруйда.
Сонуннар
Ордук ааҕаллар
