Хатас оптуобуһа: “Отчуоттан – отчуокка» дьылҕа быһаарыллыах курдук

Нэһилиэк баһылыга Евгений Пермяков отчуотугар сигэннэххэ, аҥаардас ааспыт биэс сылга Хатас элбэх оҕолоох ыалын ахсаана 78-нан эбиллэн, 293-кэ тиийбит, нэһилиэнньэ пропискалаах олохтооҕо 6 тыһ. тахсыбыт. Чуолаан Баҕарах түөлбэтигэр куорат элбэх оҕолоохторугар сир учаастага бэриллэн, 293 (!) элбэх оҕолоох ыаллаах бүтүн бөһүөлэк үөскээн турар.

Маныаха Хатаска сэбиэскэй кэмтэн ЯПАК МУТ 103 №-дээх маршрута сылдьар. Ол эбэтэр ааспыт үйэҕэ олохтоммут биир маршрутунан, саҥа түөлбэлэри, элбэх оҕолоохтор кыбартаалларын таарыйбакка, сылдьар. Онон, саҥа түөлбэлэр олохтоохторо муҥ саатар 103 №-дээх оптуобус тохтобулугар диэри таксинан кэлэллэр. Быһалыы куоракка диэри айанныахтарын, киһи эрэ уйуммат сыаната. Холобура, сарсыарда куоракка үлэҕэ, үөрэххэ киирии төлөбүрэ – 800 солк. саҕаланар, онтон атын кэмҥэ 600 солк. түспэт. Онон, бу сытыы кыһалҕаны Хатас олохтоохторо хаһыс да мээрдэригэр сыл аайы сылайбакка туруорсан кэллилэр.

«Киин куоракка» Өрөспүүбүлүкэ Ытык сүбэтин чилиэнэ, Хатас олохтооҕо Василий Иннокентьевич Сорокоумов тахсан, бу кыһалҕаҕа бэйэтин санаатын этиннэ:

– Элбэх оҕолоохтор кыбартаалларыгар оптуобус ыытыах буолтара хас да сыл буолла. Тохтуур миэстэтэ кытта бэлэм даҕаны, күн бүгүнүгэр диэри быһаарылла илик.

“Киин куорат” ытык кырдьаҕас ыйытыытынан Дьокуускай куорат Олохтоох дьаһалтатын Эдуард Садовников салайааччылаах Суол инфраструктуратын уонна тырааныспар департаменыгар тахса сылдьыбытын, ЯПАК МУТ ыыттылар.

ЯПАК МУТ эксплуатацияҕа отделын начаалынньыга Светлана Чусовская:

– Да, ити боппуруоһу билэбит. 103 №-дээх маршрут Баҕарах түөлбэнэн эргийдэҕинэ, график хайдах уларыйыахтааҕын, онно төһө бириэмэ барыахтааҕын, ол эбэтэр интервал хас мүнүүтэнэн уһуохтааҕын суоттаан, Суол инфраструктуратын уонна тырааныспар департаменыгар бигэргэтиигэ ыыппыппыт.

Салгыы куорат баһылыгын бастакы солбуйааччы Владимир Евгеньевич Дорожкиҥҥа таҕыстыбыт:

– Бу боппуруос үөрэтиллэ сылдьар. ЯПАП бэлэмнээбит бырайыагынан, маршрут уһатыллан биэрдэҕинэ, оптуобустар интерваллара лаппа уһуур. Нэһилиэнньэ ону сөбүлээбэтэх этэ. Оттон оптуобус ахсаанын эбэн биэрэргэ урут оптуобус тиийбэт буоллаҕына, билигин суоппар тиийбэт. Хатас маршрутугар иккис барыйаан быһыытынан Кангалаас курдук маршруткаҕа тиэрдэр кыра оптуобуһу киллэрии баар. Хатас дьаһалтатыгар ити боппуруоһу үөрэтэргэ сорудахтаабыппыт.

Хатас нэһилиэгин дьаһалтатын баһылыга Евгений Пермяков иһитиннэрбитинэн, муус дьэ хамсыах курдук.

– Кырдьык, хаһыс да сылын дьарыктанар, туруорсар кыһалҕабыт. Бөһүөлэкпит күн-түүн улаата, нэһилиэнньэбит сыллата элбии турар кэмигэр оптуобус сырыыта сытыытык турар. Быйылгыттан дьэ олохтоох хамсаныылар баран эрэллэр. Ол курдук, ааспыт күһүн ГИБДД, ЯПАП, суол инфраструктуратыгар эппиэттээх департамент бэрэстэбиитэллэрэ кыттыылаах хамыыһыйа үлэлээбитэ. ГИБДД өттүттэн эрдэ туһааннаах суол бэлиэлэрэ, оптуобус тохтуур миэстэтэ бэлэмнэниллибиттэрэ. Бу хамыыһыйа түмүгүнэн Суол инфраструктуратын уонна тырааныспар департамена оптуобус киирэр «сиэптэрин» уонна эргийэр былаһааккатын бэлэмниэхтээх, – диэн быһаарар баһылык Евгений Петрович.

– Евгений Петрович, оттон интервалы уһаппакка эрэ бөһүөлэк иһинэн туспа оптуобуһу сырытыннарыы тоҕо кыаллыбатый?

– Оннук ньыманы эмиэ үөрэтэбит. 44 №-дээх федеральнай сокуонунан куонкурус ыытыллыахтаах. Нэһилиэк бүддьүөтэ онно эппиэттэспэт. 103 №-дээх оптуобус маршрутун Маалгын, Дьаарын түөлбэлэригэр, Степная, Труд, о.д.а. уулуссалары таарыйар гына уһатыыга эмиэ тэҥинэн үлэлэһэбит.

* * *

Ити курдук, ытыктабыллаах В.И. Сорокоумов суругар маннык хартыына ойууланан таҕыста. Аны саас Баҕарахха суол үлэтэ ыытыллыахтаах. Таарыйа Маалгын, Дьаарын түөлбэлэри эмиэ оптуобус сырыытынан хааччыйыы ньымата үөрэтиллэр. Бөһүөлэк иһинээҕи дуу, маршрутнай оптуобус тохтобулугар тиэрдэр дуу оптуобуһу нэһилиэк бүддьүөтэ уйуммат. Ол эрээри, бу боппуруос барыта быһаарылыннаҕына да, биир саамай сытыы кыһалҕа – суоппар тиийбэт.