Хас биирдии хаарбах дьиэ туспа быһаарыыны эрэйэр

Аҕыйах хонуктааҕыта баһылык Дмитрий Садовников хаарбах туруктаах дьиэлэри көтүрүү, олохтоохтору көһөрүү хаамыытын билсэн турар. Оттон хас биирдии дьиэ туспа быһаарыыны эрэйэр. Холобур, Сэргэлээх уул., 12 турар элбэх кыбартыыралаах мас дьиэҕэ бүгүҥҥү күҥҥэ биир ыал хаалан олорор. Олох-дьаһах сыһыаннаһыыларыгар департамент (ДЖО) салайааччыта Евгения Семенова быһаарбытынан, дьиэ кэргэн доруобуйатынан хааччахтаах киһилээх буолан, саҥа кыбартыыраҕа көһөллөрүгэр кэккэ харгыстары көрсүбүттэр. Чуолаан саҥа кыбартыыра бырайыага кэлээскэлээх киһи сылдьарыгар табыгастаах гына уларытылларын күүтэллэр. Бу кыһалҕанан ДЖО Өрөспүүбүлкэтээҕи ипотека агентствотыгар (РИА) тахсыбыт. Ол түмүгэр РИА кэлээскэлээх киһиэхэ табыгастаах гына уларытан биэрэргэ сөбүлэспит. Дьиэ кэргэн саҥа кыбартыыраҕа көһөөтүн кытта көтүрүү ыытыллыахтаах. Оттон эргэ дьиэ миэстэтигэр Өрөспүүбүлүкэтээҕи лицей-интэринээккэ 150 миэстэлээх олорор куорпус тутуллуохтаах.

Дмитрий Садовников бу боппуруоһу баһылыгы солбуйааччы Алексей Гарагуля тус хонтуруолугар туттарда.

«Жилкомсервис» МУП дириэктэрэ Юрий Спиридонов быһаарбытынан, бүгүҥҥү күҥҥэ хас да хаарбах дьиэни тэҥинэн көтүрэ сылдьаллар. Ол курдук, кэлэр нэдиэлэҕэ Чайковскай, 117/1 уонна Билибин, 42/5 турар икки мас дьиэни көтүрүү түмүктэниэҕэ.

Эргэ дьиэ матырыйаалын куорат полигонугар тиэйэллэр, сорҕотун оттукка туһаҕа таһаараллар.

Санатар булллахха, сорох аадырыстарга гаас ситимиттэн араарыы үлэтэ ыытыллар. Дмитрий Садовников туһааннаах сулууспаларга аҕыйах хаалбыт дьону көһөрө охсон, көтүрүү графигын оҥорорго сорудахтаан турар.