ХАПТАҔАС СИТТЭ. Барыанньа, сироп, мармелад

Олус элбэх пектиннаах, ол аата ис уорган үлэтигэр туһата баһаам. Лимоннааҕар уонна апельсиннааҕар элбэх С битэмииннээх. Йод, калий, железо, А уонна Р битэмииннэр бааллар. Хааны убатар, сүһүрүүнү суох оҥорор, сүрэҕи, тымырдары аһатар. Киһини тиритиннэрэр буолан организмтан ордук уу тахсарын көҕүлүүр, ыарыһах кыраадыһын түһэрэр.

Ыарахан хара үлэҕэ уонна уустук өй үлэтигэр сылдьар дьоҥҥо туһалаах. Хаптаҕаска аллергиялыыр киһи олох аҕыйах. Саамай туһалыыр дьоно – хат сылдьар дьахталлар – ис иһигэр сылдьар кырачаан уҥуоҕа бөҕөргүүрүгэр туһалыыр.

Тымныйыы, тумуу кэмигэр хаптаҕаһы ууга оргутан, аҥаардастыы сиэн ситиһиилээхтик эмтэниэххэ сөп. Ангинаҕа хаптаҕас уутунан сайҕаннахха күөмэй ириҥэтэ түргэнник хоҥнор.

Барыанньа, сироп, мардмелад

Хаптаҕас сүрдээх аһыы отон, онон барыанньалыырга саахара тэҥ-тэҥҥэ буолара ордук. Эбилик быһыытынан апельсины, мандарины, клубниканы тутуннахха, барыанньа сыта, амтана өссө тупсар.  

Хаптаҕастан муорус оҥорор сироп буһаран хаһааныахха сөп. Саахарын икки бүк элбэх гынабыт, тэҥ-тэҥҥэ уулуубут. Кыра уокка тэптэрэ түһэн баран ньыһыйабыт, блендердиибит. Ситэ сойо илигинэ сиидэ нөҥүө сүмэһинин эрэ сүүрдэн ылабыт. Кыра бытыылкаларга кутан тоҥоруохха, сөрүүн сиргэ ууран хаһааныахха сөп.

 Хаптаҕас мармеладын оҥорорбутугар эмиэ сиропка курдук элбэх саахардыыбыт. Сиидэлээн ылан баран лимон кислотатын бороһуогун эбэн, арыынан сыбаммыт иһиккэ холодильникка сойутабыт. Бысталаан баран саахар пудратыгар булкуйабыт. Элбэх С битэмииннээх, доруобуйаҕа туһалаах мармелады оҕолор наһаа сөбүлүүллэр.