Хаппырыыһа суох дьиэ сибэккилэрэ

Замиокулькас (долларовай)

Саамай хаппырыыһа суох сибэкки. Ууну кутаргытын умнан да кэбистэххитинэ төһө баҕарар өр туруон сөп. Кини ууну, сииги модьу умнаһыгар, силистэригэр хаһаанан кэбиһэр, ол иһин курааны тулуйумтуо. Буора барыта хаппытын эрэ кэннэ уулатар ордук – 2-3 нэдиэлэҕэ биирдэ. Күн уотугар улаханнык наадыйбат, онон күлүк соҕус да сиргэ туран үүнэр. Өссө биир үтүө өттө – кыбартыыра кураанах салгыныгар холкутук үүнэр.

Сансевиерия (“щучий хвост”, “тёщин язык”)

Бөҕө-таҕа, тулуурдаах үүнээйи. Сүрүн уратыта кини сииги таһаарбат, барытын бэйэтэ иһэр буолан төһө баҕарар уу кутуллубакка туруон сөп. Күҥҥэ түннүккэ да, ханна эмэ дьиэ муннугар хараҥаҕа  да үчүгэйдик үүнэр. Аһара кураанах салгынатан эмиэ куттаммат. 2-4 нэдиэлэҕэ биирдэ, буора куурбутун эрэ кэннэ уу кутуохха сөп. Салгыны куһаҕан эттиктэртэн ыраастыыр.

Хлорофитум

Сибэккилээҕин умнан кэбиһэ-кэбиһэ өйдөнөр дьоҥҥо барсар сибэкки. Силиһэ бөҕө, суон буолар, уутун онно хаһаанар. Күлүккэ үүнүөн сөп. Кэхтэн истэҕинэ уу куттахха тиллэн кэлэр, түргэнник төрүүр-ууһуур сибэкки. Салгыны барыларыттан үчүгэйдик ыраастыыр.

Толстянка (денежное дерево)

Кини – суккулент, бэйэтэ-бэйэтигэр үүнэ турар. Буора хатаччы хаттаҕына эрэ уу кутабыт. Элбэх ууну кутардааҕар, хатарбыт ордук. Күннээх түннүккэ түргэнник үүнэр, күлүккэ да этэҥҥэ туруон сөп.

Спатифиллум (женское счастье)

Улахан хаппырыыһа суох, ол эрэн сиигирдэ сылдьыыны ирдиир. Күлүккэ да үүнүөн сөп. Кыра күннээх сиргэ уурар ордук. Ууга наадыйдаҕына сэбирдэҕэ ньалбайан түһэр. Батарея таһыгар уурбаппыт, элбэх ууну дьалкыччы куппаппыт – оччоҕо сибэккилиир.

Өссө маннык хаппырыыһа суох сибэккилэр бааллар:

Эпипремнум. Түргэнник үүнэр, биирдэ эмэ уу кутаргытын умуннаххытына да өлбөт, кураанах салгыны тулуйар, күлүктээх да сиргэ тулуһар.

Аглаонема. Сиигин бытааннык таһаарар. Элбэхтэ иһитин уларытыллыа суохтаах. Дьиэ хоту өттүгэр түннүктэргэ уурарга барсар.

Каланхоэ. Суккулент, уутун сэбирдэхтэригэр хаһаанар, курааны тулуйар. Сырдыгы таптыыр. Сарбыйан истэххэ саҥа салаалары таһааран иһэр.

Бокарнея («слоновья нога», «бутылочное дерево»). Суон умнастаах, онно уутун хаһаанар, ол иһин олох аҕыйахтык уу кутуллуохтаах. Сырдыгы таптыыр.

Дьиэ сибэккилэригэр ууну элбэҕи кутардааҕар, олох да уулаппатах ордук.

Саас-сайын ыйга биирдэ уоҕурдуунан аһатабыт, күһүн-кыһын аһаппаппыт.