ХАЛЛААН УОТА

Кини икки Бүлүү быысаһар сиригэр, Чыбыыда уонна Быракаан диэн улахан үрэхтэр ыккардыларыгар турар. Дойдубуттан арахпытым бүтүн биир киһи үйэтэ буолла диэтэхпинэ, омун буолбата буолуо. Ол эрэн дойдум барахсаҥҥа сотору-сотору тиийэн күүс-уох ылынабын. Өрдөөҕүтэ, отой эдэр сылдьан, бэрт дьиктини көрөн турардаахпын. Харбалаах 2 кыра-кыра дэриэбинэҕэ арахсар: Күл уонна аҕыйах мастаах лоскуй ойуур нөҥүө – Майаахы. Мин Күлгэ олорор этим.

Кыһын оройо. Таҥха кэмэ. Ый быыһа эбитэ дуу, хабыс-хараҥа. Дьүөгэбиниин Майаахыга баран истибит. Тохсунньу торулуур тымныытын да аахайбакка, сэһэн-тэппэн, күлүү- үөрүү. Арай эмискэ тулабыт сып-сырдык буола түстэ. Туома, киһи хараҕа саатар! Көрбүппүт, халлааны икки аҥыы хайыппыкка дылы, усталыы, көбүс-көнө сурааһын курдук буолан баран, кэтит соҕус, сып-сытыы уот тыган олорор. Соһуйдубут аҕай! Мин саҥабыттан матан хааллым, туох эрэ наһаа сылаас бүттүүммүн кууһан кэбистэ. Оннук турукка киирэн, чочумча дөйбүт курдук турдум. Оттон кыыһым улахан баҕайытык өмүрдэ (ийэтэ өмүрэх этэ). Син добуоччу соҕус турдубут быһыылаах. Сырдык уоппут аа-дьуо симэлийэн, сүттэр-сүтэн, сабыллан хаалла. Оҕобут бэрт буолан эбитэ дуу, отой куттамматахпыт. Хата, мин сүргэм көтөҕүллэн, ис-испиттэн туохтан эрэ үөрүөх санаам кэлбитэ. Ийэбэр кэпсээбиппэр, ийэм:

– Ырай аана аһыллыбыт буолуон сөп. Дьоллоох киһиэхэ арыллар диэччилэр, оҕом дьоллоох киһи буолсугун. Саҥарбатаҕыҥ үчүгэй. Тугу эмэ сыыһа-халты саҥаран куһаҕаны оҥостуохха сөп, – диэбитэ. Бу түбэлтэ буолбута үйэ аҥаарыттан ордук кэм ааста да, кэрэ өйдөбүл буолан, сүрэхпэр иҥэн хаалбыт. Ол өрдөөххө көрбүт халлааным уота олоҕум устатын тухары сырдыгынан сыдьаайан, өрүү миигин арыаллыыр, сирдиир курдук. Ыарахан түгэннэрбэр чахчы көмөлөһөр диэн бигэ эрэллээхпин.