«Халлааммыт» 175 миэтэрэ өрө көппүтэ

Ааспыт сыл сэтинньи 9-15 күннэригэр Саха сирин оскуолаларын оҕолоругар Наука аччыгый академиятын дьиэтигэр «Воздушная-инженерная школа» лааҕыр буолан ааспыта. Онно кыттыан баҕалаахтар «Тоҕо мин бу лааҕырга талаһабын» диэн эссе суруйан талыллан сүүмэрдэммиттэрэ. Мин олор кэккэлэригэр түбэһэн дьолломмутум. Лааҕыры Бауман аатынан МГУ устудьуоннара уонна Кванториум үлэһиттэрэ салайан ыыппыттара.

Бастакы икки күн биһиги ракета 3-Д мадьыалын оҥорбуппут. Онтон дьэ, үһүс күммүтүттэн, ракетаны бэйэтин оҥорон саҕалаабыппыт. Оскуолабытыттан үс уол этибит – мин, Уйгун Старков, Павел Адамов. Биһиги Уйгуннуун ракета корпуһун оҥорбуппут, оттон Павел платаларга бырагырааманы оҥорбута. Үлэбитин хомуйан баран бэйэбит көрүүбүтүнэн ойуулаабыппыт. Ракетабытын «ХАЛЛААН» диэн ааттаабыппыт. Бүтэһик күммүтүгэр оҥоһуктарбытын көтүтэн көрбүппүт. Хас биирдии ракета суолун устатын көрдөрөр датчиктаах буолан, хамаандалар көрдөрүүлэрэ бигэргэммитэ. Биһиэнэ 175 миэтэрэ өрө көтөн баран көппүт сириттэн уонча миэтэрэ тэйиччи төттөрү кэлэн түспүтэ.

Эксперимент түмүгүнэн үлэбитин барытын түмэн, тиһэн баран бырайыак курдук көмүскээбиппит. Барыта 27 оҕо кыттыыны ылбыта. Амма, Горнай, Хаҥалас улуустарыттан уонна Дьокуускай куораттан. Мин бэйэм «Авиамоделирование» куруһуогар үһүс сылбын сылдьар буоламмын, бу тэрээһини олус сэҥээрдим, сөбүлүүр дьарыгым туһунан элбэҕи биллим, онтон дуоһуйдум. Аны «Аэролодка» бырайыакпын бүтэрэн, араас быыстапкаларга, конференцияларга кыттар былааннаахпын.

Инники олохпун инженерияны кытта ситимниэхпин баҕарабын. Мин курдук дьарыктаах оҕолорго маннык тэрээһиннэр олус көмөлөһөллөр, инникигэ кынаттыыллар. Тэрийээччилэргэ улахан махталбын тиэрдэбин.