Халаан уута ылбыт сирдэригэр уот арахсар

Дьокуускай уонна куорат кытыы бөһүөлэктэригэр уот эбийиэктэрэ ууга барыахтарын сөп сирдэригэр уотунан хааччыйыы быстах кэмҥэ хааччахтанар. Туһааннаах сиригэр уу таһыма сэрэхтээх таһымы ааста да, уоту араараллар. Бу барыта дьоҥҥо, кыылга-сүөлгэ кутталлаах быһыы-майгы тахсыбатын туһуттан ылыллар быһаарыы.

Ол курдук, “Якутскэнерго” ПАУо иһитиннэрбитинэн, бүгүҥҥү туругунан, Дьокуускайга “Водозабор-2” лииньийэтин учаастагар баар 3 кэмпилиэк трансформатор подстанцията, ону таһынан “Даркылаах-2” 6 кВлаах лииньийэтин   9 кэмпилиэк уонна  уот остуолбатын трансформаторын подстанцияларын араарбыттар.

Жатайга даамба баар сиригэр 2 абоненскай кэмпилиэк трансформатор подстанциятыгар уонна   Кангалас түөлбэтин биир трансформаторыгар уоту араарбыттар.

ЦЭС үлэһиттэрэ ураты болҕомтолоох буолуу эрэсиимигэр киирбиттэр.  Уот эбийиэктэрин  кытаанах хонтуруолга ылбыттар.

Ол да буоллар, ууга ылбыт, ылан эрэр сирдэригэр уот боруобат намылыйан турар, быстыбыт, уот баҕаната сууллуохча буола иҥнэйбит, трансформатор подстанциятын аана аһыллыбыт чахчытын көрдөххүтүнэ суһаллык:

элбэх ханааллаах Контакт-киин 8 -800-100-22-05 нүөмэригэр эрийэн биллэриэх кэриҥнээхпит.

Ону тэҥэ Киин РЭС ЦЭС Суһал-эпэрэтиибинэй бөлөҕүн дьуһуурунай диспетчерин нүөмэрин төлөпүөҥҥүтүгэр сурунан кэбиһиҥ - 005, 8-4112-21-55-68

Дьокуускайдааҕы Кэлим-диспиэччэр сулууспатын нүөмэрэ 44-45-44.