Хабаров уулуссатын аспааллааһын күһүн былааннанар

Евгений Григорьев иһитиннэрбитинэн, Хабаров уулуссатыгар бастакы өрөмүөннэнэр учаастагы (Ярославскай – Чиряев) күһүн саҕаланыытыгар аспааллааһын былааннанар.

Бу учаастак уһуна – 700 миэтэрэ, ол иһигэр тас сырдатыы, газопроводы таһаарыы уонна тротуар оҥоһуута киирэр. 2026 сылга Хабаров уулуссатын аныгыскы учаастагын – Чиряев уулуссатыттан Богатыревка диэри өрөмүөн үлэтэ былааҥҥа баар. Бэдэрээттэһэр тэрилтэ 2027 сыл бүтүөр диэри бары үлэни ыытар былааннаах. Дуогабар суумата – 705,3 мөлүйүөн солкуобай. Бэдэрээтчит – «РИК Автодор»АХ.

«Хабаров уулуссатыгар биһиги быйыл Ярославскайтан Чиряевка диэри бастакы учаастакпыт былааннанар. Аспааллааһын ыытыллыа. Газовиктар үлэлэрин түмүктээри көхтөөхтүк үлэлииллэр. Ол кэнниттэн тротуардары чөлүгэр түһэрии барыаҕа. Күһүҥҥэ диэри бу учаастагы икки араҥанан аспааллаан сабарга былаанныыбыт», – диэн Евгений Григорьев иһитиннэрдэ.

Хабаров уулуссатыгар суол бүрүөһүнүн, ууну аһарар турбаны оҥоруу, ону тэҥэ үрдүк баттааһыннаах гаас ситимин турбаларын ууруу үлэтэ түмүктэннэ. Ууну ыытар халдьалары оҥорууга үлэ барар, билиҥҥитэ 210 миэтэрэ туруоруллубут. Ону тэҥэ бетон акылааттарга тутуһар күрүөнү-хаһааны, тротуардар тэлгэнэр сирдэрин оҥоруу, бортовой таастары монтажтааһын, тротуар билиитэлэри, лотуоктары ууруу уо.д.а. үлэлэр ыытыллаллар.