Хабаров уулуссатыгар өрөмүөн үлэтэ икки түһүмэҕинэн ыытыллыаҕа

Дьокуускайга Хабаров уулуссатын хапытаалынай өрөмүөнүн бастакы түһүмэҕэ салҕанар. Ол курдук, Ярославскай уулуссатыттан Богатырев уулуссатыгар диэри суол кэрчигэ «Олох инфраструктурата» национальнай бырайыак иитинэн оҥоһуллуоҕа.

Бэдэрээтчит – «РИК Автодор» АУо. Муниципальнай сакаасчыт – «Главстрой» муниципальнай хааһына тэрилтэтэ. Өрөмүөннэнэр суол кэрчигин уопсай устата – 1,450 км.

«Главстрой» тэрилтэ дириэктэрин солбуйааччы Петр Андреев иһитиннэрбитинэн, быйылгы сылга суол таҥаһа оҥоһуллара, гаас ситимэ саҥардыллара былааннанар. Билиҥҥи туругунан сатыы дьон сылдьар тротуардара көтүрүллэр, ол кэннэ билиитэлэрэ ууруллуоҕа, күрүөлэрэ туруоруллуоҕа, сырдатыы үлэтэ ыытыллыаҕа.

Этиллибит эбийиэккэ үлэ икки түһүмэҕинэн барыаҕа. Ол курдук, 2025 сылга Ярославскай уулуссатыттан Чиряев уулуссатыгар диэри суол кэрчигэ (устата – 700 миэтэрэ) оҥоһуллуоҕа. Оттон ордубут учаастак – Чиряев уулуссатыттан Богатырев уулуссатыгар диэри кэрчик 2026 сылга өрөмүөннэнэрэ былааннанар.  

Хабаров уулуссата – киин куорат биир саамай элбэх сырыылаах, кэлиилээх-барыылаах уулуссата. Онон суолу бүтүннүү саппакка, үлэни икки түһүмэххэ арааран, уочаратынан ыытар быһаарыы ылыллыбыт.

Санатан эттэххэ, «Олох инфраструктурата» национальнай бырайыак 2025 сыл тохсунньу 1 күнүттэн саҕаламмыта. Сүрүн сыала – гражданнары саҥа инфраструктуранан хааччыйыы.