Хабаров уулуссатыгар хапытаалынай өрөмүөн саҕаланна

"Олох инфраструктурата" национальнай бырайыак чэрчитинэн Хабаров уулуссатын Ярославскай уул. быһа охсуһуутуттан Богатырев уул. диэри учаастагар өрөмүөн үлэтэ саҕаланна. 
Өрөмүөнү ыытыыга бэдэрээтчитинэн "РИК Автодор" АУо буолар. Сакаасчыт – "Главстрой" МКУ. Өрөмүөн ыытыллар суолун уһуна – 1,45 км.
"Главстрой" МКУ дириэктэрин суолу тутууга солбуйааччыта Петр Андреев иһитиннэрбитинэн, "РИК Автодор" АУо тротуардар эргэ бүрүөһүннэрин, ойоҕос таастары, сатыы сылдьар сир аҕыраадаларын көтүрэр үлэни саҕалаабыт.
"Ыам ыйын иннинэ Ярославскай уул. Ленин проспегар диэри ууну ыытар холлоҕостору көтүрүү уонна манна траншеялары оҥоруу былааннанар. Көтүрүллүбүт тротуар оннугар тротуар декоративнай плитката тэлгэниэ", – диэтэ Петр Андреев 

Ленин проспегыттан Ярославскай уулуссатыгар диэри кэрчиккэ өрөмүөн үлэтэ ыам ыйын 12 күнүгэр диэри ыытыллыа. Ол кэннэ Ленин проспегын перекрестогыттан Богатырев уулуссатыгар диэри учаастакка үлэ барыа. Суолу олоччу сабыы былааннаммат – үлэлэр сырыы балаһаларынан араарыллан ыытыллыахтара. Суолу бүтүннүү сабыы 7 эрэ күн, гаас ситимигэр футлярдары туруорарга,  былааннанар.
Маны сэргэ хапытаалынай өрөмүөн чэрчитинэн Хабаров уулуссатын икки кытыытынааҕы тротуардарын тутууну былаанныыллар.