Хаарты билгэтэ туолбута

Л., куорат олохтооҕо:

Биирдэ ийэм дьуһуурустубатыгар барбыт күнүгэр дьүөгэм хоно кэллэ. Быраатым уонна балтым кыралар, оскуолаҕа үөрэнэллэр. Мин университеты саҥа бүтэрэн, идэбинэн үлэ булбакка, маҕаһыыҥҥа атыыһыттыы сылдьар кэмим.

Киэһэ чэйдээн бүттүбүт уонна оҕолору сытыаран баран кэпсэтэ олордубут. Вика (аатын уларыттым) эмискэ: «Сэрэбиэйдэниэххэ», –  диэн турда. Оруобуна Таҥха кэмэ этэ. 

Бу иннинэ дьүөгэм кинигэ маҕаһыыныттан Күн Куйаарыма билгэлиир хаартытын атыылаһан кэлбит. Бииргэ үлэлиир кыргыттара олус кырдьыгы этэр диэн кэпсээбиттэр, омуннаан эттэххэ, ол эрэ хаартынан күннэрэ саҕаланар уонна түмүктэнэр, букатын суумкаларыгар укта сылдьаллар үһү.  Дьэ, ол хаартытын ойутан таһаарда. Сабыс-саҥа, туттулла илик өссө үчүгэй диэн үөрдүбүт.

Дьэ, доҕор, арай хаарты холуодатын харса суох булкуйан баран: «Миигин бу сылга туох күүтэрий?» – диэн испэр санаан баран быстым. Итиэннэ үс хаартыны талан ылан иннибэр уурдум. Бастакы хаартыбын көрдүбүт. Чуолкай бу диэн өйдөөбөппүн, ол эрээри таптал иһэр, түмүгэ айдааннаах буолуо диэн ис хоһоонноох этэ. Иккис хаартыттан дьүөгэбиниин тото күллүбүт. Оҕо кута батыһар диэн. «Бүт эрэ, баһаалыста», – диэтибит. Ол саҕана кими да таптыы илигим, ойох тахсар, оҕолонор туһунан толкуйдаан да көрбөтүм. Ити түгэн оннук хаалбыта.

Сотору биир улуус киинигэр эдэр исписэлииһинэн ананан тиийбитим. Ол күһүн бастакы кэргэммин кытта билсибитим, аҕыйах ыйынан хат буолан, саахсаламмыппыт. Бастаан утаа үчүгэйдик олорбуппут. Кыыс оҕоломмуппут. Онтон киһим аһыы утахха убаммыта, аны күнүүһүтэ диибин диэн. Ол аайы кыыһырсыы, этиһии. Уһуннук олорботохпут, айдааннаах соҕустук арахсыбыппыт.Төрөппүттэрим оҕобун кытта көһөрөн илдьэ барбыттара. Чэ, ол бэйэтэ туспа кэпсээн.

Билигин үс оҕо ийэтэбин. Иккис кэргэним сытыары сымнаҕас майгылаах.   

Мин санаабар, Таҥха, чахчы, дьикти кэм. Ол эрээри олус үлүһүйбэккэ, сэмээр сэрэбиэйдэниэххэ, инникини билгэлэниэххэ сөп дии саныыбын.