Хаарбах дьиэттэн көһөрүүгэ эппиэттээх тутааччы моҥкуруут  буоллаҕына?

Ол курдук, гражданка бигэргэтэринэн, кини олорор дьиэтин көһөрөр эбээһинэстээх тутааччы моҥкуруут буолбутунан, олохтоохтору көһөрүү боппуруоһа халлааҥҥа ыйанан хаалбыт.

Альберт Семенов быһаарбытынан, сокуон быһыытынан, көһөрүү уочарат бэрээдэгинэн ыытыллар. Холобура, бүгүҥҥү күҥҥэ 2017 сыл тохсунньу 1 күнүгэр диэри саахалланар туруктааҕынан билиниллибит дьиэлэри көһөрүү бастакы уочарат быһаарыллыахтаах.

Бу болдьох кэнниттэн хаарбаҕынан билиниллибит дьиэлэри көһөрүү эмиэ болҕомто кииниттэн тахсыбат. Дьокуускай куораты сайыннары маастар-былаанынан 2030 сылга диэри Дьокуускай куоракка 950-тан тахса хаарбах дьиэ көтүрүллүөхтээх. Маны сэргэ 2025 сылтан үлэлиир «Олох инфраструктурата» саҥа нацбырайыак эмиэ хаарбах дьиэлэри көтүрүүнү хабар.

Кэпсэтии Куорат дууматын спикерэ гражданка үҥсүүтүн сиһилии ырытан баран туох көмөнү оҥорор кыах баарын быһаарыах буолбутунан түмүктэннэ, диэн Куорат дууматын пресс-сулууспата иһитиннэрэр.

Бэлиэтээн эттэххэ, Олохтоох дьаһалта бэнидьиэнньиктээҕи планеркатыгар 2026 сылга Дьокуускайга 25 хаарбах дьиэни көтүрэр сорук турарын, бу нэдиэлэҕэ Дьиэ-уот сыһыаннаһыыларыгар департамент мантан 9 дьиэни көтүрүүгэ бэдэрээтчити быһаарыахтааҕын туһунан иһитиннэрбиттэрэ. Дьиэлэр олохтоохторо номнуо көһөрүллүбүттэр.

Оттон бу иннинэ, муус устар саҥатыгар, баһылык араадьыйанан уонна тэлэбиидэнньэнэн тэҥинэн ыытыллар «Дьокуускай бүгүн» быһа биэриигэ бүгүҥҥү күҥҥэ Дьокуускай куоракка 1000 кв м тахса иэннээх хаарбах уонна саахалланар туруктаах дьиэ хаалан турарын иһитиннэрбитэ.

«Бу дьонтон барыларыттан дьиэлэрин атыылаһан ылан саҥа дьиэҕэ көһөрөргө куорат бүддьүөтүттэн аччаабыта 8 млрд солк. наада диэн суоттаабыттар. Оттон куорат, холобур, 2026 сыллааҕы уопсай бүддьүөтэ 33 млрд солк. быһыллан турар, ол иһигэр 26 млрд солк. аҥаардас үөрэхтээһин эйгэтигэр ананар. Ол эбэтэр хаалбыт хаарбах дьиэлээхтэри көһөрөргө, этэргэ дылы, сүүс да сыл тиийбэт», - диэн турар кини.

 

Мантан сиэттэрэн Евгений Григорьев хаарбах уонна саахалланар туруктаах дьиэттэн көһөрүү федеральнай бырагыраамата салҕанара тыын суолталааҕын ыйбыта. Маныаха кини дойду баһылыга Владимир Путин 2023 сыл балаҕан ыйын 1 күнүгэр диэри хаарбаҕынан билиниллибит дьиэлэри 2030 сылга диэри көһөрөргө туруорбут соругар эрэнэрин эппитэ. Оттон Дьокуускайга 2017 сылтан итинник туруктаах 937 дьиэ баарын ыйар.

Оччотугар хаарбах туруктаах дьиэлэр кыһалҕаларын быһаарарга ороскуоттанар сүүһүнэн мөлүйүөнү атын хайысхаларга, холобур, социальнай эбийиэктэри тутууга ыытыахха сөбүн быһааран турар.