Хаарбах дьиэттэн көһөрүү болдьоҕо уһуон сөп

Ааһан эрэр 5 сыл иһигэр киин куоракка хаарбах дьиэттэн көһөрүү бырагырааматынан 7244 киһи көһөрүллүбүт: 2021 сылга – 868, 2002 сылга – 966, 2023 – 2160, 2024 – 1169, 2025 сылга – 2081. Мантан көстөрүнэн, хаарбах дьиэттэн көһөрүү Дьокуускай куоракка саамай үрдүк көрдөрүүтэ 2023 сылга (2160 киһи) бэлиэтэммит.

Нэһилиэнньэни хаарбах уонна саахалланар туруктаах дьиэттэн көһөрүү муниципальнай бырагырааманы таһынан өрөспүүбүлүкэ уонна федеральнай киин туһааннаах бырагыраамаларынан үбүлэнэр.

Манна даҕатан, өрөспүүбүлүкэтээҕи бырагыраама 2025 сылынан түмүктэниэхтээх этэ. Чуолаан 2017 сыл тохсунньу 1 күнүгэр диэри хаарбаҕынан билиниллибит дьиэлэр олохтоохторо балаҕан ыйын 1 күнүнэн көһөрүллэн бүтүөхтээхтэрэ. Маныаха сөптөөх үбүлээһин суоҕуттан бүгүҥҥү күҥҥэ 153 тыһ. кв.м иэннээх дьиэ «салгыҥҥа ыйанан» турар. Ил Түмэҥҥэ иһитиннэрэллэринэн, ол төрүөтүнэн олорор дьиэни тутуу сыаната 2,8 (!) төгүл үрдээбитэ буолбут.

Үөскээбит балаһыанньанан Ил Түмэн Арассыыйа Госдууматыгар «2019-2025 сылларга нэһилиэнньэни хаарбах уонна саахалланар туруктаах дьиэттэн көһөрүү» бырагыраама болдьоҕун 2028 сылга диэри уһатар уонна 2017 сыл тохсунньу 1 күнүгэр диэри хаарбах туруктааҕынан билиниллибит дьиэлэри көһөрүүнү түмүктүүргэ Территориялары сайыннарыы пуондатыттан эбии үбүлээһини көрөр туһунан сокуон барылын киллэрбит.