Хааһына хас биирдии харчыта туһаҕа турар дуо?

Отчуокка этиллибитинэн, АСП уопсайа 192 эбийиэккэ хонтуруоллуур уонна эспиэрдиир-анаарар бэрэбиэркэни ыыппыт; о.и. министиэристибэлэр, судаарыстыбаннай тэрилтэлэр, муниципальнай оройуоннар, судаарыстыба кыттыгастаах кэмиэрчэскэй тэрилтэлэр хабыллыбыттар.

Ол курдук, хааһына 393,4 млрд  солк. үбэ төһө сөпкө уонна көдьүүстээхтик  туттуллубута бэрэбиэркэлэммит; ити иһигэр: 393 млрд солк. – судаарыстыбаннай бүддьүөт үбэ, 158 мөл. солк. – олохтоох бүддьүөт. Ону таһынан Булгуччулаах мэдиссиинэ Территориятааҕы пуондатын 328 мөл. солк. үбүлээһинин бэрэбиэркэлээбиттэр.

Былырыын бэрэбиэркэлэммит кээмэй – иннинээҕи сыл киэниттэн 17 млрд солк. үгүөрүтэ этиллэр. Ол түмүгэр хааһына 9,9 млрд солк. үбүн туһаныыга бүддьүөт сокуонун кэһии баара быһаарыллыбыт.

Бэрэбиэркэлэнэр үп улаатыытын тилэх баттаһа, бүддьүөт сокуонун кэһии көрдөрүүтэ да иннинээҕи сылтан эбиллэн биэрбит: о.э. 4377 түгэҥҥэ бэлиэтэммит. Бүддьүөт сокуонун кэһии баһыйар үгүс өттө – чопчута 6,6 млрд солк. – буҕаалтыр учуотун оҥорууга, отчуот оҥоһуллуутугар сыһыаннаах.

Аны, бүддьүөтү таҥыыга уонна толорууга 3,1 млрд солк. суумалаах кэһии булуллубут. 7 бэрэбиэркэ түмүгүнэн матырыйаал толоруллан Прокуратураҕа, ол иһигэр 4 тэрээһин түмүгүнэн дьыала Сэлиэстийэ кэмитиэтигэр, ИДьМ-ҥа уонна УФСБ-га ыытыллыбыт. Прокуратура уорганнара 6 представлениены түһэрбиттэр. Бүддьүөккэ 40 мөл. солк. төннөрүллүбүт.

Бэрэбиэркэ түмүгүнэн, 2024 с. тэҥнээтэххэ, икки бүк элбэх – 60 административнай боротокуол толоруллубут. Уопсайа холбоон 532 тыһ. солк. суумалаах 35 ыстыраап анаммыт, 17 сэрэтии бэриллибит.

Итиннэ эбии нуорма-быраап аактатын (НБА) 104 барылын эспэртиисэлээбиттэр. О.и. муниципальнай бэйэни салайыныы уорганнарын киэнэ баар. Ол түмүгэр  үлэлии турбут НБА-ҕа 21 уларыйыы киирбит, 4 саҥа нуорма-быраап аактата оҥоһуллубут. Ону тэҥэ биэдэмистибэ уонна муниципальнай таһымҥа 90-ча этиини киллэрбиттэр.

Ааҕар-суоттуур палаата 1,7 млрд солк. суумалаах кэһии тахсыаҕын тохтоппут. Ол курдук, 2026 сыллааҕы судаарыстыбаннай бүддьүөт бырайыагын эспэртиисэлээн, үлэлээбэт нэһилиэнньэ ОМС-ка страховой усунуоһугар анаан, 1,2 млрд солк. үгүөрү үп былааннаммытын быһаара охсон, бүддьүөт 2-с ааҕыытыгар ол алҕас туоратыллыбыт.

(Салгыыта бэчээттэниэ)