Губинскай уокурук олохтоохторо дьаһалта үлэтин үчүгэйинэн сыаналаатылар

Губинскай уокурук олохтоохторо тохсунньу 29 күнүгэр баһылык Евгений Григорьевка ааспыт 2024 сылга ыытыллыбыт үлэ түмүгүнэн махталларын биллэрдилэр.
Евгений Григорьев ааспыт 2024 сылтан дойду баһылыга Владимир Путин өйөбүлүн ылбыт Дьокуускай куорат маастар-былаанын олоххо киллэрии саҕаламмытын, ол чэрчитинэн үс бөдөҥ уопсастыбаннай туона үлэҕэ киирбитин бэлиэтээтэ – Ленин болуоссата, Р.М. Дмитриев аатынан кытыл уонна Сайсары эбэ кытыла.
2024 сылга киин куоракка барыта 5 үөрэх кыһата үлэҕэ киирбитэ, чугастааҕы кэмҥэ икки күүтүллэр – ДСК оройуонугар 990 миэстэлээх оскуола уонна Саха политехническэй лицей салҕааһына. Быйыл 7 эбийиэк тутуллуоҕа.
«Куттала суох уонна хаачыстыбалаах суоллар» нацбырайыагынан Губинскай уокурукка Бестужев-Марлинскай уулуссатын Богдан Чижиктан Федор Попов уулуссатыгар диэри кэрчигин хапытаалынай өрөмүөнүн бастакы түһүмэҕэ ыытыллыбыта. Маны сэргэ Набережнай уулусса 203-с түөлбэҕэ «Намыв» ыстаансыйаҕа диэри кэрчигэ оҥоһуллубута.

2024 сылга уокурукка икки сылаас тохтобул баар буолла – 202-с 4 №-дээх поликлиника таһыгар уонна Р.М. Дмитриев аатынан кытылга. Губин уулуссатыгар спорт саалатын тутуу саҕаламмыта, итиэннэ бу уулуссаны 4 хаарбах дьиэттэн босхолоон, биир хаарбах дьиэ олохтоохторун көһөрүү саҕаламмыта.
Үүммүт 2025 сылга 203-с түөлбэҕэ В.П. Ефимов уулуссата тутуллуоҕа, Хабаров уулуссатын кэрчигин уонна Дзержинскэй уулуссатын Ленин проспегыттан Кальвица уулуссатыгар диэри чааһын хапытаалынай өрөмүөн күүтэр. Губин уулуссатыгар спорт саалатын тутуу салҕаныаҕа, Богатырев, Губина уулуссаларыгар турар хаарбах дьиэлэр олохтоохторо көһөрүллүөхтэрэ. 
Отчуот чэрчитинэн олохтоохтортон киирбит ыйытыылар уонна баҕа санаалар кэккэлэригэр Р.М. Дмитриев аатынан сквери көҕөрдүү, сөтүөлүүр сири 203-с түөлбэҕэ диэри кэҥэтии, 21, 33 №№-дээх оскуолалары кэҥэтии, анал байыаннай дьайыы кыттыылаахтара тус дьыаланы арыналларыгар өйөбүл, Глобальнай үөрэхтээһин оскуолатыгар салҕааһын, «Айыы кыһата» оскуолаҕа спорт саалата, салҕааһын эбэтэр эбии дьиэ наадата киирдилэр. Ленин пр., 6 дьиэтигэр өрөмүөн ирдэнэрэ, уокурук оскуолаларын слетун ыытан, уопут атастаһар балаһаакка тэрийэр баҕа санаа эмиэ этилиннэ. 
Губинскай уокурук олохтоохторо Олохтоох дьаһалта баһылыгар Хабаров уулуссатыгар 14-с №-дээх маршрут төннүбүтүгэр, Р.М. Дмитриев аатынан кытыл тупсарыллыбытыгар, уопсайынан, ааспыт 2024 сылга ыытыллыбыт бары үлэ иһин махталларын биллэрдилэр, диэн иһитиннэрэр Олохтоох дьаһалта пресс-сулууспата.