Гражданствоны туоһулуур бэчээт туһунан

14 сааһыгар диэри оҕо Төрөөбүтүн туһунан сибидиэтэлистибэтигэр гражданствотын туһунан анал бэчээт (штамп) туруохтаах. Онто пааспар ыларыгар биитэр кыраныысса таһыгар тахсарыгар ирдэнэр.

Эрдэ гражданствоны кэрэһилиир маннык бэчээти ирдэммэт түгэнигэр наадалааҕынан аахпаттар этэ. Оттон билигин? Булгуччу маннык штамп ирдэнэр:

*2023 сыл алтынньы 26 күнүн кэнниттэн Арассыыйаҕа төрөөбүт кырачааннар сибидиэтэлистибэлэригэр.

*Гражданствоны бигэргэтэр атын докумуона суох оҕолор. Холобур,  уруккулуу иһэ (вкладыһа) суох Төрөөбүтүн туһунан сибидиэтэлистибэлээхтэргэ.

Гражданствоны кэрэһилиир бэчээтэ суох хайдах да кыаллыбат:

— Оҕоҕо кыраныысса таһыгар сылдьар пааспары оҥорторуу.

— 14 саастан бэриллэр дойду иһинээҕи пааспары ылыы.

— Оҕону олорор дьиэтигэр регистрациялатыы.

— Дойду иһинээҕи пааспарынан уонна  Төрөөбүтүн туһунан сибидиэтэлистибэнэн сылдьыахха сөптөөх атын дойдуларга.

— Оҕо төрөппүтүн кыраныысса таһыгар сылдьар омук пааспарыгар оҕо туһунан бэлиэтээһини киллэртэрии.

— ДНР, ЛНР, Запорожье,  Херсон уобаластарыттан ураты сирдэргэ олорон  Ийэ хапытаалын оҥорторон, туһаныы.

Маннык бэчээти уурдарарга наада:

— Бигэргэммит, анал халыыпка толоруллар сайабылыанньа. ИДьМ саайтыттан хачайдыахха сөп.

— Оҕо төрөөбүтүн туһунан сибидиэтэлистибэ.

— Икки төрөппүт пааспардара.

— Оттон төрөппүттэр арахсыбыт түгэннэригэр,  Арахсыы туһунан сибидиэтэлистибэ ирдэнэр.

— Атын киһини көрдөһөн штамп туруортарары былаанныыр түгэҥҥэ, ол киһи  аатыгар нотариуһунан бигэргэммит дэбиэринэс ирдэнэр.

— Сайабылыанньаны МФЦ-га биитэр ИДьМ отделениетыгар тиийэн туттарыллар. Судаарыстыбаннай өҥө порталыгар суруйтарыахха син.

Бэлэм буолар болдьоҕо, сыаната:

— Босхо туруоруллар.

— Киирбит сайабылыанньа 5 үлэ күнүгэр диэри кэмҥэ көрүллүөхтээх.

— Бэчээт Төрөөбүтүн туһунан сибидиэтэлистибэ кэлин сирэйигэр ууруллар.

Арай аккаас бэрилиннин?

— Оччотугар сыыһа толоруллубуту, итэҕэс оҥоһуллубуту ситэриллэр уонна сайаапканы саҥалыы толорон, иккистээн туттарыллар.

Өскөтүн  аккаас олоҕо, төрүөтэ суох бэриллибит диир буоллахха, ИДьМтан эбэтэр эрэгийиэннээҕи эбэтэр УМВД Кылаабынай управлениетыттан аккаас тоҕо бэриллэрин туһунан сиһилии быһааран, суруйан биэрэллэрин модьуйар бырааптааххыт. Онтон аккаастаннахтарына, борокуратуураҕа да тиийиэххэ сөп.

Бу туһунан Объясняем. Рф телеграм ханаалыгар суруллар.