Госдуумаҕа дьиэ кэргэни өйүүрү туһунан толкуйдаатылар: 1 мөлүйүөнү төлүөхтэрин баҕараллар. Онтуҥ усулуобуйалаах.

Элбэх оҕолоох дьиэ кэргэн иккиттэн биири талыан сөп: босхо сир учаастага эбэтэр 1 мөл. солк. харчы. Маннык этиилээх Госдуума дьокутаата Сергей Миронов таҕыста.

“Элбэх оҕолоох ыалларга босхо сир учаастагын биэрии үксүгэр табыллыбат. Ыалларга сир эбэтэр кырата 1 мөл. солк. компенсация ылары талларыахха наада”, - диэн парламентарий эттэ.

Дьокутаат этэринэн, элбэх оҕолоох дьиэ кэргэттэр сир учаастактарын хас да сыл кэтэһэллэрэ үгүс. Уонна сирдэрин ылан да баран, тутууга, олорорго табыгаһа суох буолуон сөп. Регионнар сир учаастагын оннугар харчынан компенсация биэриэхтэрин сөп, ол гынан баран бу үксүгэр 200-300 тыһ. солк. эрэ тэҥнэһэр, диэн ТАСС иһитиннэрэр.

Онон, Миронов компенсацияны 1 мөлүйүөҥҥэ диэри улаатыннарарга, маны дойду үрдүнэн барытыгар киллэрэргэ, “чэпчэтии чахчы үлэлииригэр” этэр.

Санатар буоллахха, Арассыыйаҕа гражданнар босхо сир учаастагын ылалларыгар хас да бырагыраама үлэлиир.

Бу чэпчэтиилэр элбэх оҕолоох дьиэ кэргэттэргэ эрэ буолбакка, байыаннай сулууспалаахтарга, бойобуой дьайыы бэтэрээннэригэр, I уонна II группалаах инбэлииттэргэ тарҕанар.  Дьон өссө атын эрэгийиэҥҥэ көһөн Уһук Илиҥҥи уонна Арктическай гектар бырагыраамаларынан туһаныахтарын эбэтэр быраҕыллыбыт учаастагы ылыахтарын сөп.