«Глобальнай үөрэхтээһин киинэ» гимназия саҥа куорпуһа 2028 сылга үлэҕэ киириэҕэ

Эрдэ суруйбуппут курдук, бүгүҥҥү күҥҥэ манна 360 миэстэҕэ 1500 курдук оҕо үөрэнэр. Бу хартыына куоракка оскуола тиийбэтин арылхайдык туоһулуур. Бу, куорат атын даҕаны социальнай инфраструктуратын кыһалҕаларын быһаарар сыалтан Дьокуускай куорат Олохтоох дьаһалтата ааспыт сылга тутааччыларга «инфраструктураҕа хомуур» диэни киллэрбитэ. «Хомуур» сыаната 1 кв/м иһин 3000 солк. быһыллыбыта.

Бастакы 12 тутааччыны кытта түһэрсиллибит сөбүлэҥнэн киирбит уопсайа 682 мөл. солк. кээмэйдээх сууманы Глобальнай үөрэхтээһин оскуолатыгар (ЦГО) эбии куорпуһу тутууга ыытар туһунан быһаарыы ылыллыбыта. Куорат дуумата бу сууманы сылларынан үллэрбитэ: 2026 – 215 мөл.солк.; 2027 – 332 мөл.солк.; 2028 – 117 мөл.солк.

Бырайыак быһыытынан, эбии куорпус 4 мэндиэмэннээх, 210 миэстэлээх. Саҥа миэстэлэр эбии үөрэнээччилэргэ буолбакка, үөрэнэ сылдьар оҕолорго табыгастаах усулуобуйаны тэрийиигэ ананыахтара. Саҥа спорт саалата, химия, физика, математика, информатика, омук тылын, география, литература, история, саха тылын,  хореография предметтэригэр анал кабинеттар, ааҕар саалалаах библиотека баар буолуохтара.

Евгений Григорьев төрөппүттэргэ быһааран биэрбитинэн, тутуу үөрэх процеһыгар мэһэйдиэ суохтаах.

Куорат дууматын дьокутаата Наталья Луковцева инфраструктураҕа хомуур киирбитин биһириирин бэлиэтээн туран, Олохтоох дьаһалтаҕа бырайыак кылгас кэмҥэ хамсаабытын иһин махталын биллэрдэ.