«Глобальнай үөрэхтээһин киинэ» гимназия эбии куорпуһун тутуу саҕаланна

Бүгүн, балаҕан ыйын 26 күнүгэр, 203-с түөлбэҕэ «Глобальнай үөрэхтээһин киинэ» гимназия эбии куорпуһун тутуу саҕаланна – акылаатын маҥнайгы тааһын ууруу сиэрэ-туома ыытылынна.

Саҥа куорпус куорат бу түөлбэтигэр эбии үөрэх миэстэтин таһаарыаҕа, ону тэҥэ үөрэнээччилэр уонна учууталлар үөрэххэ, билимҥэ уонна айар дьоҕурдарын сайыннарар усулуобуйалара тэриллиэҕэ.

Бэлиэтээн эттэххэ, күн бүгүн гимназияҕа 1350-тан тахса оҕо үөрэнэр. Биэс сыл устата оскуола куорат биир бастыҥ үлэлээх кыһатыгар кубулуйда. Түөрт мэндиэмэннээх, 3,5 тыһыынча квадратнай миэтэрэ иэннээх дьиэ үүнэргэ-сайдарга саҥа саҕахтары арыйыаҕа.

Тутуу «Дьокуускай куорат уокуругун социальнай инфраструктуратын кэлим сайыннарыы» муниципальнай бырагыраама чэрчитинэн ыытыллар.

Бүгүҥҥү үөрүүлээх тэрээһиҥҥэ Саха Өрөспүүбүлүкэтин Ил Дархана Айсен Николаев, Дьокуускай куорат баһылыга Дмитрий Садовников, үөрэх уонна билим миниистирэ Ньургуна Соколова, үөрэх управлениетын начаалынньыга Андрей Новоприезжай, гимназия дириэктэрэ Алексей Чудиновских, педагогтар, төрөппүттэр уонна үөрэнээччилэр кытыннылар.