Гимназиябыт киэн туттар выпускнига, холобур буолар хорсун буойун

Биһиги оскуолабытыгар Ийэ дойдуну көмүскээччи сылын түмүктүүр тэрээһин – анал байыаннай дьайыы кыттыылааҕа, оскуолабыт выпускнига Владимир Диодоров-Лаврентьев сырдык кэриэһигэр оскуолалар икки ардыларыгар байыаннай-прикладной күрэх ыытылынна. Манна Саха гимназиятын сэргэ «Чирээйэп кэскиллэрэ»: Дьокуускай куорат национальнай гимназиятын уонна «Айыы кыһата» гимназия 8-10 кылааһын үөрэнээччилэрэ кытыннылар.

Тэрээһин бастакы чааһыгар оскуола дириэктэрэ Валентина Софронеева, Владимир күн күбэй ийэтэ Светлана Диодорова-Лаврентьева, бастакы учуутала Людмила Дедюкина, «Воин» байыаннай-патриотическай киин старшай инструктора Кирилл Каратаев истиҥ-иһирэх, харах уулаах, олус долгутуулаах ахтыыларын тэрээһин бары кыттыылаахтара сүрдээҕин иһийэн, чуумпуран олорон иһиттилэр, сүрэхтэригэр чугастык ылыннылар.

Вова кыра сааһыттан киирбит-тахсыбыт, сытыы-хотуу, элэккэй майгылаах, үөрүнньэҥ уол этэ. Оскуолаҕа үөрэнэр сылларыгар оҕо-ыччат тэрилтэтигэр көхтөөхтүк кыттан, спорт өттүгэр сыстаҕас буолан, үгүс күрэхтэһиигэ гимназиятын аатын элбэхтик ааттаппыта. Оскуоланы ситиһиилээхтик бүтэрэн, салгыы медколледжка үөрэнэн, медбыраат идэтин ылбыта.

Вова кыра сааһыттан аҕатын Владислав Алексеевич иитиитинэн эр киһилии уһаарыллыбыта, олоххо толору бэлэмнээх ыччат буола үүммүтэ. Туохха барытыгар үчүгэйи көрөр, сырдыгы көрдүүр, кырдьыксыт майгылааҕа. Кыра эрдэҕиттэн туохтан да толлубат хорсунун, харса суоҕун бары өйдүүбүт. Кини муустаах ууга түспүт оҕолору быыһаабыта, Саха сиригэр буолбут улахан баһаарга баҕа өттүнэн тиийэн көмөлөспүтэ, хамсык кэмигэр биир бастакынан дьону өрүһүйүүгэ туруммута ахтылынна.

Анал байыаннай дьайыы бастакы күннэриттэн Ийэ дойду көмүскэлигэр туруммута. Вова танковай взводтан саҕалаан, кэлин байыаннай медик быһыытынан сулууспалаабыта. Кини көмөтүнэн үгүс байыас тыына уһаабыта, эмтэнэн, атаҕар турбута. Бииргэ сулууспалаабыт бойобуой доҕотторо ымыттыбат майгылааҕын, сиргэ-уокка сатабыллааҕын, булчут  киһи буоларын быһыытынан кыраҕы харахтааҕын туоһулууллар.

Хомойуох иһин, Владимир бу сыл муус устар ыйыгар баара-суоҕа 24 сааһыгар бааһырбыт саллааттары, офицердары быыһыы-өрүһүйэ, эмтии сылдьан уоттаах сэрии хонуутугар хорсуннук охтубута.

Бу күн анал байыаннай дьайыыга хорсуннук сэриилэспит, кыайыы туһугар олоҕун толук уурбут «Боб» диэн позывнойдаах Диодоров-Лаврентьев Владимир Владиславовичка аналлаах «Модун санаа, өлбөт өрөгөй» быыстапка тэрилиннэ. Манна Вова наҕараадалара, мэтээллэрэ, грамоталара, хаартыскалара, сэриигэ тутта, кэтэ сылдьыбыт байыаннай таҥаһа, медицинскэй суумката, буулдьа дьөлө көппүт кааската, өстөөхтөн былдьаабыт былааҕа, ийэтигэр суруктара, сибэкки быыһыгар түспүт олоҕун бүтэһик хаартыската бааллар.

Вова куруутун инники күөҥҥэ сылдьар хорсун быһыытын, төрөөбүт дойдутугар бэриниилээх буолуутун туоһулуур элбэх наҕараада көрдөрүүгэ турдулар: «Анал байыаннай дьайыыга медицинскэй көмөнү оҥоруу, идэтигэр бэриниилээх буолуу» мэтээлинэн, РФ Ыксаллаах быһыыга-майгыга уонна гражданскай оборона дьыалаларыгар министиэристибэтин «Ууга былдьаммыт дьону быыһааһыҥҥа» мэтээлинэн, РФ Оборонаҕа министиэристибэтин «Бойобуой доҕордоһууну бөҕөргөтүү» уонна «Анал байыаннай дьайыы кыттыылааҕа» мэтээллэринэн, өрөспүүбүлүкэҕэ баһаары утары охсуһууга СӨ Ил Дарханын бэлиэтинэн, анал дьайыыга хорсунун иһин «Эр санаа» уордьанынан наҕараадаламмыта. Бу быыстапканы оҕолор сүрдээҕин сэргээн, сирийэн, долгуйа, киэн тутта көрдүлэр-иһиттилэр.

Тэрээһин иккис чааһыгар «Чирээйэп кэскиллэрэ» 8-10 кылаастар үөрэнээччилэрин икки ардыгар байыаннай-прикладной күрэх ыытылынна. Ол курдук, хамаанда бэриллээтин кытта, бронежилет, кааска, автомат сүгэ сылдьан хас биирдии байыас 7 түһүмэҕи ааста: БПЛА, сыыллан барааһын, автоматы ыһыы уонна хомуйуу, гранатаны быраҕыы, штурм, автоматынан сыал ытыы, тактическай медицина, бааһырбыттарга суһал көмөнү оҥоруу уонна эвакуациялааһын.

Сытыы, хатыһыылаах, эрийсиилэээх күрэх түмүгэр Айыы кыһата (сал. С.А. Николаев) – III миэстэни, ДьКНГ (сал. А.Ю. Федоров) – II миэстэни, Саха гимназията (сал. Е.Е. Жерготов) I миэстэни ыллылар. Кыайыылаах хамаанда Владимир Владиславович Диодоров-Лаврентьев аатынан көһө сылдьар Кубогынан уонна мэтээллэринэн наҕараадаланна, Саха гимназиятын «Аҕа сүбэтин» көхтөөх чилиэнэ, «Уруу» хампаанньа дириэктэрэ В.Е. Куприянов кыайбыт хамаанда хас биирдии кыттыылаахтарыгар уол оҕо харысхалын туттарда. 2-3 миэстэни ылбыттар мэтээлинэн, дипломунан бэлиэтэннилэр.

Маны таһынан анал ааттар кыайыылаахтара ааттаннылар: «БПЛА бастыҥ оператора» – Айаал Корякин, Саян Елисеев (СГ); «Бастыҥ ытааччы» – Иван Полушкин (ДьКНГ), Айтал Васильев (СГ); «Бастыҥ медик» – Нарыйа Петрова (СГ), Леня Софронеев (АК). Бу оҕолорго буойун төрөппүттэрэ бэлэмнээбит анал мэтээллэрин Вова ийэтэ Светлана Владимировна уонна гимназия дириэктэрэ Валентина Васильевна туттардылар.

Тэрээһин иккис чааһын ОБЗР учуутала подполковник Егор Егорович Жерготов, «Воин» киин сыһыарыылаах инструктор-методиһа, кылаабынай судьуйа Семен Семенович Ючюгяев уонна күрэх судьуйалара, байыаннай-патриотическай киин инструктордара сүрдээх чуолкайдык, үрдүк таһымҥа ыыттылар.

Түмүккэ Владимир Диодоров-Лаврентьев күн күбэй ийэтэ Светлана Владимировнаҕа анаан Рустам Каженкин «Саллаат ийэтигэр» хоһоонугар, Саха гимназиятын дириэктэри иитэр үлэҕэ солбуйааччы Степан Ноев мелодиятыгар ырыатын гитараҕа оонньоон, ыллаан иһитиннэрбитэ олус долгутуулаах түгэн буолла.

Бу улахан, патриотическай суолталаах тэрээһин туһунан салайааччылар, төрөппүттэр, кыттааччылар санааларын үллэһиннилэр.

Эрэл – күрэх кыттааччыта, Айыы кыһатын үөрэнээччитэ:

– Бу күрэхтэһии олус үчүгэйдик ааста. Мин санаабар, бэркэ кытынныбыт. Маннык күрэх хамаанданан үлэлииргэ, түмсүүлээх буоларга уонна түргэнник туттарга-хаптарга үөрэтэр. Владимир Диодоров-Лаврентьев хорсун, үтүө санаалаах буойун эбит. Олус туһалаах, оҕолору элбэххэ үөрэтэр тэрээһин, күрэхтэһии буолла.

Ньургун Винокуров, Саха гимназията:

– Үчүгэйдик кытынныбыт. Атын кылаастары, оскуолалары кытта алтыспыппыт олус үчүгэй. Физическэй таһыммытын үрдэттэ.

Эркин, ДьКНГ:

– Үчүгэй, ол гынан баран сыыһалары оҥордубут. Онтон хомойбоппут, аныгыс сырыыга күүскэ бэлэмнэнэн, өссө үчүгэйдик кыттыахпыт дии саныыбын. Учууталбыт Аркадий Юрьевич көмөлөстө, элбэххэ үөрэттэ. Владимир Диодоров-Лаврентьев хорсун ыччат эбит. Маннык күрэхтэһиилэр олус наадалар.

Аркадий Федоров, ОБЗР учуутала, ДьКНГ:

– Күрэхтэһиибит олус тыҥааһыннаахтык ааста. Бары кыахтара тиийэринэн, санааларын ууран кытыннылар. Олоҕун толук уурбут эдэркээн дьоруой аатын үйэтитэр, ыччаты Ийэ дойдуну таптыырга, бэриниилээх буоларга үөрэтэр күрэх инникитин даҕаны хорсун быһыы, патриотизм туһунан дириҥ өйдөбүлү биэрэр үтүө үгэс буолуоҕа.

Саха гимназиятын «Аҕа сүбэтин» чилиэннэрэ Дьулустан Аргунов, Николай Прибылых:

– Бүгүн олус үчүгэй байыаннай-патриотическай тэрээһин буолла. Саха гимназията бэйэтин выпускнигын аатын үйэтитэн, улахан таһымҥа таһаарда. Бу тэрээһини көрөн олус сэҥээрдибит уонна үөрдүбүт. «Аҕа сүбэтэ» өссө да инникитин маннык тэрээһиннэри өйүөҕэ уонна көмөлөһүөҕэ.

Светлана Диодорова-Лаврентьева, Вова ийэтэ:

– Миэхэ тус бэйэбэр наһаа долгутуулаах күн. Мин оҕобун үчүгэйдик санааннар, күрэхтэһии ыыппыттарыгар улахан махталбын тиэрдэбин. Оҕом сырдык кэриэһигэр аналлаах байыаннай-прикладной күрэх сыл аайы сайдан, инникитин киэҥ эйгэҕэ тахсыан баҕарабын.

Антонина Титова, «Волонтер Туймаады» уопсастыбаннай холбоһук салайааччыта:

– Урут элбэх күрэххэ сылдьыбытым, кыттыбытым, ол эрээри бүгүҥҥү тэрээһин ураты патриотическай тыыннаах, киһиэхэ туох баар үчүгэй өрүтүн арыйан көрдөрөр дии санаатым. Мин Вова ийэтэ Светлана Владимировналыын билсэбин. Кини сүрдээх улахан үлэни ыыта сылдьар, эмтэнэ сытар уолаттарбытыгар көмөлөһөр, санааларын көтөҕөр. Маннык күрэхтэһии элбэх буолуохтаах, бу – патриотическай иитиигэ олус үчүгэй холобур. Ыытыллар үлэ түмүгэ көстөр. Оҕолор маладьыастар!

Семен Ючюгяев, «Воин» киин методист-инструктора:

– Күрэх былаанын ОБЗР учуутала Е.Е. Жерготов уонна Саха сиринээҕи «Воин» киин баһылаан, салайан, көҕүлээн ыыттыбыт. Бу оскуоланы кытта бииргэ үлэлээбиппит номнуо сыл буолла. Гимназия дириэктэрэ В.В. Софронеева байыаннай-патриотическай үлэҕэ улахан болҕомтотун уурар, ол да иһин оскуола бу хайысхаҕа ситиһиилээхтик, холобур буолар гына үлэлиир. Кыттааччылар, төрөппүттэр, көрөөччүлэр сүрдээҕин сэҥээрдилэр. Күрэхтэһии сылын ахсын ыытыллара былааҥҥа киирдэ.

Ити курдук, оскуолабыт киэн туттар выпускнига, «Эр санаа» уордьаннаах хорсун буойун Диодоров-Лаврентьев Владимир Владиславовичка анаммыт сүрдээх курус эрээри, сырдык санааны, эрэл кыымын, Ийэ дойдуга бэриниилээх буолуу үтүө холобурун көрдөрөр, чахчы, улахан суолталаах тэрээһин буолла.