Үгэс буолбут киинэ бэстибээлэ быйыл кыһын ыытыллар
«Аан дойду араас муннуктарыттан кэлэр ыалдьыттарбыт өрөспүүбүлүкэбит кыһыҥҥы кэрэтин, айылҕабыт уратытын уонна тыйыс усулуобуйаҕа олорон киинэни устар дьоммутун көрүөхтэрэ», – диэтэ бэстибээли тэрийээччи, «Сахафильм» салайааччыта Алексей Егоров.
Кини этэринэн, тэрээһини кыһын ыытар бэстибээл сүрүн тиэмэтин – Киһи уонна Айылҕа алтыһыытын – өссө киэҥник арыйар кыахтаах.
IX Дьокуускайдааҕы норуоттар икки ардыларынааҕы киинэ бэстибээлин бырагырааматын толору кээмэйдээх киинэлэр күрэстэрэ, күрэххэ киирбэт уонна анал көрдөрүүлэр, дьыалабыай уонна үөрэх бырагыраамалара, айар көрсүһүүлэр уонна маастар-кылаастар киэргэтиэхтэрэ.
Бэстибээл сүрүн бирииһэ – «Кыһыл көмүс хаар ачыкыта» – толору кээмэйдээх бастыҥ киинэҕэ туттарыллыаҕа. Оттон дьүүллүүр сүбэ анал бирииһигэр тиксэр үлэҕэ, бастыҥ режиссерга, дьахталларга уонна эр дьоҥҥо бастыҥ оруол иһин «Үрүҥ көмүс хаар ачыкыта» туттарыллыаҕа.
Тэрийээччилэр кэпсээбиттэринэн, саха киинэлэриттэн кыайыылааҕы көрөөччүлэр бэйэлэрэ быһаарыахтара, ону сэргэ Саха сириттэн кыттар үлэлэргэ киинэ оператора Иннокентий Аммосов аатынан бастыҥ операторскай үлэҕэ анал бириис олохтонуоҕа.
Норуоттар икки ардыларынааҕы дьүүллүүр сүбэ састаабыгар Казахстантан, Монголияттан, Кытайтан, Арассыыйаттан уонна Саха сириттэн киинэ, тэлэбиидэнньэ уонна култуура биллиилээх маастардара киирэллэр. Бу туһунан өрөспүүбүлүкэ бырабыыталыстыбатын пресс-сулууспата иһитиннэрэр.