Георгий Бессонов ханнык оруолтан куттанарый?

Тыйаатыртан – киинэҕэ

Георгий оҕо эрдэҕиттэн сценкаларга оонньуур, ыллыыр, хомус тардар эбит. «Хотугу сулус» өрөспүүбүлүкэтээҕи күрэххэ ситиһиилээхтик кыттара. Артыыс буолуохтааҕа эрдэттэн биллэр курдуга эрээри, оччолорго Саха сиригэр үрдүк үөрэх кыһата суоҕа.  

Онон оскуола кэнниттэн, ийэтин суолун батыһан, СГУ төрүт култуура салаатыгар туттарсан киирбитэ. Ырыаһыт Лэгэнтэйдиин, Сиэйэ Уолунуун бииргэ үөрэммиттэр. Куурус оҕолоро сорохтор ырыаҕа, үҥкүүгэ уһуйуллубуттар, оттон Георгий оччолорго Көр-күлүү тыйаатырын салайааччыта Алексей Павловка кэпсэтии жанрын устуудьуйатыгар дьарыктаммыт.

– Билигин даҕаны сыанаҕа тахсарбар кыбыстабын, долгуйабын. Киинэҕэ эмиэ оннук. Мин санаабар, оннук адреналин баар буолуохтаах, – диир хайыы үйэ уопуттаах артыыс.

Георгий этэринэн, тыйаатыры уонна киинэни тэҥниир табыллыбат. Чахчыта да, оннук.

Кэнники ситиһиилэриттэн кэпсээтэххэ, «Көстүүм бэрийээччи» испэктээккэ чаҕылхайдык оонньоон, «Хаарыан хампа күөх кытыл» бэстибээлгэ «Бастыҥ эр киһи оруола» анал ааты ылбытын ааттыахха сөп.

Киинэҕэ бастакы холонуута – «Дорообо, Дьокуускай». Бэйэтэ билинэринэн, артыыс быһыытынан 100 бырыһыан арыллан үлэлээбит киинэтэ – «Кута». Бу Степан Бурнашевка уһуллубут бастакы бырайыага. Бэйэтэ этэринэн, режиссер толору көҥүлү биэрбит, ол иһин ис-иһиттэн төлө барбыт курдук оонньообут.  

Ааспыт сырыыга «Киин куоракка» режиссер Степан Бурнашев сэргэх сэһэнэ тахсыбыта. Көтүппүт буоллаххына, киирэн аах.

– Киһи бэйэтин экраҥҥа көрөн, син биир астыммат. Искэр ситэри биэрбэтэх курдук сананаҕын. Итиннэ тоҕо оннук гымматахпыный, атыннык этиэхтээх эбиппин, маны тоҕо көрбөтөхтөрүй, итинник буолуо суохтаах этэ, о.д.а. элбэх ыйытыы киирэр. Аныгыскы сырыыга ону учуоттуу сатыыгын. Сороҕор «Актерский дубль» абырыыр. Түргэн соҕустук, буоллун-хааллын диэбит курдук уһулларбын сөбүлээбэппин, – диир кини.

«Бансу» киинэҕэ Аляска олохтооҕун, шериф оруолун оонньуур, ангылычаан тылынан саҥарар. Онуоха 2015 сыллаахха Степан Бурнашев «Атын олох» киинэтигэр уһулларыгар ый кэриҥэ АХШ-га олорбута улаханнык көмөлөспүт.

«Бансу» норуоттар икки ардыларынааҕы бырайыак буолан, билигин санкцияҕа баран, долбуурга турар, көрөөччү киэҥ эйгэтигэр тахса илик киинэ.  

Москубаларга аккаастаабыт

Георгий «Айта» уонна «Лоокуут уонна Ньургуһун» киинэлэргэ, этэргэ дылы, сүүрэ сылдьан уһуллубут. Күнүскү өттүгэр Константин Тимофеев бырайыагар барара, оттон киэһэ Степан Бурнашев хамаандатыгар кыттыһара. Хата, кэккэлэһэ турар дэриэбинэлэргэ буолан, табыгастаах эбит. Иннокентий Луковцев уонна Айталина Цыпандина эмиэ оннук үлэлээбиттэр.

Кэпсээнтэн кэпсээн диэбиккэ дылы, Георгий ол икки сиринэн сүүрэкэлии сырыттаҕына, Москваттан эрийбиттэр. Киинэҕэ оруолга бигэргэттибит, бачча чыыһылаҕа көтөн кэлэргин күүтэбит диэн. Ботуччу гонорары эппиттэр.

– Аккаастанным. Атын бырайыакка эрдэттэн сөбүлэспитим диэн быһаардым. «Айтаҕа» үлэлээн ырааттаҕым дии, ыллым даҕаны баран хаалбат буоллаҕым. Оннук табыллыбат.

Георгий этэринэн, харчы биирдэ баар, биирдэ – суох, артыыс сүрэҕинэн сөбүлээбит бырайыагар ордук табыллан үлэлиир.   

«Айта» киинэҕэ оҕолорун сүтэрбит ийэлээх аҕа (Ильяна Павлова, Георгий Бессонов) айманар сыаналара, чахчы, көрөргө ыарахан этэ. Устар бөлөххө үлэлээбит кыргыттар тэбис-тэҥҥэ ытыы олорбуттар. Артыыстар оруолларыгар оннук күүскэ киирэн, итэҕэтиилээхтик оонньообуттар.

Артыыс туохтан толлоруй?

– Романтик оруолуттан. Сатаан эрийсибэппин эҥин (күлэн тоҕо барабыт). Биирдэ «Чужая» диэн киинэҕэ кастинг буолла. Биир дьахтары кытта «хоонньоһуохтаах» үһүбүн, «сыт» диэн сорудахтаатылар. Толордум. Арай дьонум хайдах эрэ көрөллөр. Ону мин: «Өссө тугу эрэ гыныахтаахпын дуо?» – диэн бэйэлэриттэн ыйытабын. Арааһа, эйэҕэстик көрүөхтээхпин, имэрийиэхтээхпин, куоласпын араастаан уларытыахтаахпын эҥин быһыылаах. Дьэ, ону олох сатаабаппын, хайдах эрэ албынныы турар киһи курдук сананабын. Миэнэ барыта «Киинэҕэ барабыт дуу, суох дуу?» диэбит курдук. Наһаа үчүгэйдик эттим дии санаабытым, баҕар, куруубай баҕайытык иһиллэрэ буолуо (Ааҕааччылар «быара суох» бараллар – Аапт.).

«Оттон кэргэҥҥин кытта хайдах эрэ «эрийсэн» ыал буоллугут ини?» – диэн ыйытыы киирдэ. «Дьэ, ыарахаттардаах этэ...» – диэн таайтарыылаахтык өрө тыынна Георгий. Итиэннэ: «Бэйэтэ бойобуой соҕус майгылаах, ол иһин хайдах эрэ билсиһэн, ыал буолан олордохпут... Ол саҕана иккиэн устудьуоннуу сылдьабыт. Мин түүннэри маҕаһыыҥҥа охраннигынан үлэлиирим уонна сарсыарда аайы кыыспар сакалаат хаалларарым. Бээ, тохтооҥ, киинэҕэ да ыҥырыы туспа стратегия этэ, – диэн өссө эбии күллэртээтэ.

Мантан салгыы артыыстыырыгар «романтик» буоларын ыарырҕатар Георгийбыт тус олоҕун сэгэттэ.

Вахтертан быыһаммыт

Кэргэнин кытта биир уопсайга олорбуттар, ол эрээри атын-атын блоктар буолан, туспа ааннарынан киирэллэрэ-тахсаллара. Биир көрүдүөргэ кыргыттар олорор өттүлэригэр быһа тахсар силбэһэ турар аан баар эбит. Георгий тэлэбиисэр антеннатынан ону арыйар күлүүс оҥорбут. Бииргэ үөрэнэр доҕоро Лэгэнтэй (ырыаһыт – Аапт.) таптыыр кыыһа эмиэ анараа блокка олорор эбит. Кешаҕа тиийэн кэпсээбитигэр, бастаан итэҕэйбэтэх, онтон баран көрдөр диэбит. Уолаттар сүүрэн тиийбиттэрэ, көрүдүөрдэрэ хабыс-хараҥа. Георгий ааны арыйа турдаҕына, оруобуна вахтер тиийэн кэлбит! Көрүдүөр уоттарын умуруора сылдьара. Лэгэнтэй ааҕар хоско дьылыс гыммыт, оттон Георгий миэстэтигэр турбутунан хаалбыт. «Өлүү болдьохтоох» диэбиккэ дылы, оруобуна выключатель таһыгар. Вахтер субу илэ бэйэтинэн барыҥнаан кэлбит. Хараҥа буолан, выключатели илиитин иминэн көрдүүр, ол аайы Георгий аһаран биэрэр. Дьэ, доҕор, балачча бодьуустаһан, уотун холбообут – көрүдүөр субу сандаара түспүт! Иннигэр уол турарын көрөн, вахтер бэйэтэ да соһуйбут. «Хайа, бу тугу гына сылдьаҕын?» – диэбит. Онуоха оччоттон артыыстыыр дьоҕурдаах Георгий: «Сасыһан оонньуу сылдьабыт», – диэн быыһаммыт.

Билигин, хас да сыл ааспытын кэннэ, чып кистэлэҥинэн эттэххэ, уолаттар ол аанынан кыргыттарга элбэхтэ сыбыытаабыттар. Кэлин атын оҕолор билэннэр, Георгийтан күлүүһү көрдүүр буолбуттар. Онон киирэллэрин-тахсалларын тохтоппуттар. 

Элбэх оҕолоох ыал аҕа баһылыга

Зоя, Георгий Бессоновтар үс оҕолоохтор. Уоллара Москубаҕа айти-дизайнерга үөрэнэ сылдьар. «Трасса» сериал иккис сезонугар аҕатын кытта уһуллубут. Улахан кыыс уруһуйдьут бэрдэ. Кыра кыыс маҥнайгы кылааска үөрэнэр, уран тарбахтаах буолсу, пластилинынан араас кыылы-сүөлү, үөнү-көйүүрү харахтарыгар, тиистэригэр, таҥастарыгар-саптарыгар тиийэ ымпыктаан-чымпыктаан оҥорор, аны үөрбүттэрин-хомойбуттарын кытта сатаан көрдөрөр.

– Оҕолорбутун буойбаппыт, суолларын бэйэлэрэ буллуннар диэн тугу да боппоппут, – диир элбэх оҕолоох аҕа.

Аны 30 сылынан бэйэтин хайдах көрөрүй?

– Оҕо сааһым улахан аҥаарын балыыһаҕа атаарбытым, инбэлиит этим. Мин эмиэ атын оҕолор курдук сүүрүөхпүн-көтүөхпүн баҕарарым. Үөрэхпин элбэхтэ көтүтэрим, ол эрээри кылааспын хаалбатаҕым. Оскуоланы оҕолорбун кытта бүтэрбитим. Миэхэ «Сыыһа баран эрэбин, тоҕо оннук гымматахпыный?» диэн кэмсинии суох. Кыра эрдэхпиттэн киһи буолуохпун баҕарар этим уонна ону толордум дии саныыбын.

***

«Киин куорат» ааҕааччыларыгар бүтэһик сонун: Георгий Улан-Удэҕа артыыс идэтигэр үөрэнэ киирбит. Биир аҕам саастаах кэллиэгэтэ сүбэ-соргу быһыытынан: «Диплом наада, ол эрээри бэйэҥ натураҕын алдьатан кэбиһиэхтэрэ, сэрэнээр», – диэбит.

Үөрэнэр хаһан да хойут буолбатах. Георгийга ситиһиилэри баҕара хаалабыт.

Хаартыскалар:

Дьоруой тус страницатыттан