Георгиевскай лиэнтэ — Кыайыы бэлиэтэ

Георгиевскай лиэнтэ Кыайыы бэлиэтэ буолан, сэбиэскэй саллааттар Аҕа дойду Улуу сэриитигэр дьоруойдуу быһыыларын, ону сэргэ Ийэ дойдубутун көмүскээбит бары көлүөнэ буойуннар хорсун сырыыларын көрдөрөр.

Бүгүн бу олус киэҥник биллибит символ билиҥҥи Арассыыйаҕа уонна Ыам ыйын 9 күнүн бэлиэтиир бырааһынньык сүрүн атрибуттарыттан биирдэстэрэ. 20 сыл устата Кыайыы күнэ «Георгиевскай лиэнтэ» аахсыйата суох ыытыллыбат. Дойдубут мөлүйүөнүнэн олохтооҕо, ону таһынан тас дойдуларга, бүттүүн бу аахсыйаҕа кыттыһаллар, сэбиэскэй норуот хорсун быһыытын, Улуу Кыайыыга сиэртибэ буолбутун уонна фроҥҥа, тыылга Сэбиэскэй сойуус араас норуота биир сомоҕо буолан кыайыыны уһансыбыттарыгар убаастабыл бэлиэтин көрдөрөллөр.

«Георгиевскай лиэнтэ» аахсыйаны 2005 сыл кулун тутар ыйга «Новости» РИА суруналыыстара толкуйдаабыттара. Эмиэ ити сыл көҕүлээһини Москуба Бырабыыталыстыбата уонна «Студенческай община» уопсастыбаннай тэрилтэ өйөөбүттэрэ. 2014 сылтан аахсыйаҕа «Бүгүҥҥү Арассыыйа» МИА «Новости» РИА үгэстэрин утумнааччы быһыытынан кыттар.

Маны таһынан аахсыйаҕа РФ субъектарыгар да, тас дойдуларга да министиэристибэлэр, биэдэмэстибэлэр, судаарыстыбаннай корпорациялар, ыччат хамсааһыннара тус бэйэлэринэн кытталлар. Уопсайа аахсыйа чэрчитинэн сыл аайы 20 мөлүйүөн лиэнтэни оҥороллор.  

2022 сыл ахсынньытыгар Арассыыйа Бэрэсидьиэнэ Владимир Путин «О Георгиевской ленте и внесении изменений в отдельные законодательные акты Российской Федерации» 579-ФЗ №-дээх Федеральнай сокуоҥҥа илии баттаабыта, маныаха Георгиевскай лиэнтэ Арассыыйа буойуннарын албан аатын биир бэлиэтэ буоларын бигэргэппитэ.

Тиэкис: May9.ru сайтан