Гаврил Винокуров: «Киһи суолун бэйэтэ солонуохтаах»

Бүгүҥҥү сэһэргэһээччибит «Bodyline» фитнес-киин төрүттээччитэ уонна салайааччыта Гаврил Винокуров урбаанньыт быһыытынан «хатарыллан» тахсыбыт кэпсээнэ кэрэхсэбиллээх, эдэр дьону элбэххэ үөрэтэр.

Кини үһүс кылааска сылдьан сиһин тоһутан, 5 киилэттэн ыараханы көтөҕөрө, бэл, үрүсээгин сүгэрэ көҥүллэммэтэ, тэтэрээттэрин пакекка уктан сылдьара. Физкултуура уруогар оҕолор сүүрэллэрин-көтөллөрүн, мээчиктииллэрин ыскамыайкаҕа олорон ымсыыра эрэ көрөрө.

Күүтүүлээх күнэ тохсус кылааска үүммүтэ – быраас физкултууранан дьарыктанарын көҥүллээбитэ! Сарсыҥҥы күнүгэр Ганя убайын батыһан спорт саалаҕа тиийбитэ, ол эрээри баҕалаах штангатын кыайан өрө анньыбатаҕа. Ити күнтэн ыла, омуннаабакка эттэххэ, спорка оройунан түспүтэ.

Сотору кэминэн күрэх­тэһиилэргэ оскуола чиэһин көмүскүүр буолбута. Сүүрүүгэ сүүмэрдэммит хамаандаҕа киирбитэ, армрестлиҥҥэ, хапсаҕайга, мас тардыһыытыгар кэккэ ситиһиилэрдэммитэ.

Оскуоланы бүтэрэр сылыгар И.М. Губкин аатынан Арассыыйатааҕы судаарыстыбаннай ньиэп уонна гаас университетын олимпиадатыгар кыттан, сүүмэрдиир түһүмэҕи ааспыта эрээри, БКЭ түмүгүнэн хапсыбатаҕа. Ол да буоллар В.П. Горячкин аатынан Москватааҕы судаарыстыбаннай агроинженернэй университекка эксээмэнэ суох быһа ылбыттара. Онно биэс сыл үөрэммитэ.

Босхо дьарыктанар туһуттан... муоста сууйара

Дойду тэбэр сүрэҕэр тиийэн да баран дьарыктанар баҕата уостубатаҕа. Ол эрээри саалаҕа сүүмэрдэммит хамаандаҕа киирбит эрэ устудьуоннар босхо сылдьар бырааптаахтара. Ийэлэрэ түөрт оҕону соҕотоҕун иитэрэ ыарахан этэ. 12 тыһ. солк. биэнсийэ уонна быыкаа истипиэндьийэ иһэ-таһа биллэрэ. Москва курдук киэҥ сиргэ харчы уу курдук барара.

– Босхо дьарыктанар туһуттан спорт саалаҕа муоста сууйааччынан киирбитим. Эрчиллии кэнниттэн хаалан сууйарым. Ол кэмҥэ 17-лээхпин, 100 киилэни өрө анньарым, 200 кг штанганы көтөҕөрүм. Ону биир тренер таба көрөн, аһаҕас чемпионакка кыттарбар сүбэлээбитэ, биир нэдиэлэ тиэхиньикэтин көрдөрбүтэ. Онно иккис миэстэни ылан, бэйэм да соһуйбутум. Университет сүүмэрдэммит хамаандатыгар ылбыттара, онон саалаҕа босхо дьарыктанар кыахтаммытым, эбиитин истипиэндьийэ ылар буолбутум.

Ганя салгыы гиирэҕэ Москва хотугу уокуругар иккис миэстэни ылбыта. Армрестлиҥҥэ аан дойду чемпионатыгар кыттыбыта, онно американецтан хотторуутун олус ыараханнык ылыммыта. Аны пауэрлифтинынан, тустуунан эмиэ дьарыктаммыта.

Үһүс куурустан спордун тохтоторго быһаарыммыта. Бииргэ үөрэнэр оҕолоро күүлэйи оройуттан туталлара, кулууптары кэрийэллэрэ,  оттон кини... дьарыктан ордубата.  Устудьуон көрдөөх олоҕун «амтаһыйыан», билиэн-көрүөн баҕарбыта. «Сыыспыт эбиппин», – диир билигин.

Биирдэ уопсайга хаартылыы олорбуттара. Хотторбут киһи уонна тардыныахтааҕа. Дьэ, доҕор, Ганя уута-хаара бары тахсыбыта, нэһиилэ тардыммыта. Ол киэһэ улахан толкуйга түспүтэ. Итиэннэ көрү-нары тохтоторго, эйгэтин уларытарга, спордугар төннөргө быһаарыммыта.

Бэһис кууруска улахан эчэйиини ылбыта эрээри, дьарыгын бырахпатаҕа. Кыра куурус устудьуоннара ону-маны ыйыталаһар, сүбэ-ама ылар буолбуттара. Онтон ыла дьарык бырагырааматын суруйан барбыта. Москваҕа Фитнес үрдүкү оскуолатыгар икки ый үөрэнэн, «Инструктор тренажерного зала» диэн туоһу сурук ылбыта.

Түөрт үлэҕэ умса-төннө түһүү

Гаврил үөрэҕин бүтэрэн кэлбит сайыныгар быстах үлэ көрдөммүтэ. Күһүн вахтаҕа барарга сөбүлэҥ түһэрсибитэ. Ол кэмҥэ «Дохсуҥҥа» дьарыктана сылдьан дьон тренер ыйыталларын бэлиэтии көрөн, «мин тренердиэхпин сөп» диэн тылламмыта. Аны атырдьах ыйыгар электригинэн киирбитэ.

– Киэһэ алта чааска диэри үлэлиирим, онтон саала сабыллыар диэри дьарыктарбын ыытарым. Ол саҕана тренер сырата соччо сыаналаммата, физкултуура учууталын курдук көрөллөрө, – диир билигин хайыы үйэ аатын-суолун оҥостубут тренер.

Балаҕан ыйа буолбута, вахтаҕа барара бу кэлбитэ. Гаврил икки ый үлэлээн баран икки ый сынньанарын күнү-дьылы сүтэрии курдук санаабыта уонна куоракка хааларга быһаарыммыта. Электриктиирин, тренердиирин быыһыгар оскуола оҕолоругар кроссовка атыылыыр буолбута, онно эбии кулуупка үлэлиирэ. 2-3 чаас утуйара, эдэр буолан сылайарын билбэтэ.

Түөрт үлэҕэ тиргиллэн, ыйдааҕы хамнаһа мунньан-тараан 80 тыһ. солк. этэ. Биирдэ киниэхэ дьарыктанар тренер «хамнаһым бачча» диэн кэпсээбитин соһуйа истибитэ. Кини түөрт үлэнэн сылдьан оччо хамнастанар туһунан толкуйдаан да көрбөтө. Ол эрээри тренердиирин ис сүрэҕиттэн сөбүлүүрэ: бииртэн биир билсиһии, доҕордоһуу, үлэттэн дуоһуйуу диэн онно баара.

– Дьон сарсыардаттан киэһэ хойукка диэри дьарыктаныахтарын баҕараллара, оттон мин киэһэ эрэ бириэмэлэнэрим. Инньэ гынан электрикпиттэн уурайбытым. Биир килийиэн кыыспын үлэҕэ ыҥырбытым, дьону иккиэн дьарыктыыр буолбуппут. Онно эбии сөпкө аһааһын туһунан кэпсиир, ону хонтуруоллуур буолбутум, кээмэйдэниини киллэрбитим. Дьарыктарбын устан, социальнай ситимҥэ угарым. Килийиэним элбээн барбыта. Өссө биир уолу үлэҕэ ылбытым, эбии иккис этээс саалатын куортамнаабытым. Балтым Москваттан университеты бүтэрэр сылыгар cycle хайысхаҕа үөрэттэрбитим.

Аны куортаммыт сыанатын икки бүк улаатыннарбыттара, онон атын сири көрдөнөргө күһэллибиппит. Ол саҕана 203-с түөлбэҕэ биир дьиэ бастакы этээһигэр 100 кв. м. тутууну олус ыарахан сыанаҕа булбутум. Балтым Москваттан кэлбитэ, онон бүтэһик харчыбын ууран туран Кытайтан сайкллары сакаастаабытым. Ол кэмҥэ дьиэм-уотум суох, саалабар хоно-өрүү сытан үлэлээбитим.

Эдэр урбаанньыт биири учуоттаабатах этэ... уоппуска кэмигэр килийиэн биллэ аҕыйыырын. Сап саҕаттан салҕанан, сайыҥ­ҥы ыйдары син этэҥҥэ аһарды­быттара. Хата, атырдьах ыйыттан киһи элбээбитэ, аны сотору кэминэн кыараҕас буолбута. Лермонтов уулуссатыгар киэҥ саалаҕа көһөн кэлбиттэрэ.

Гаврил урбааҥҥа үгүс үөрэҕи ааспыта. Итиэннэ «Bodyline» диэн ааты франшиза оҥоруохха сөп диэн санаа күөдьүйбүтэ.  Муҥутаан кэҥээбит кэмнэригэр Дьокуускайга 4 филиалы сэргэ, түөрт улууска филиаллана сылдьыбыттара.

Пандемияны бэлэм көрсүбүтэ

Ол маннык этэ. 2018 сыллаахха ыҥырыынан алта улууһу кэрийэн, маастар-кылаастары ыытан кэлбитэ. Үөрүөн иһин, бассаап бөлөх арыйарга этии бөҕө киирбитэ.

– Алта улуустан 30-ча киһи нүөмэрин ылбытым, куоракка кэлээт, тута бөлөх арыйбытым. Дьарыктарбын устан, сөптөөх аһааһын туһунан кэпсээн ыытарым, астарын хонтуруоллуур буолбутум.  Сотору кэминэн бөлөхпөр 100-тэн тахса киһи киирбитэ, – диир онлайн дьарыгы биир бастакынан саҕалаабыт тренер.

Ити кэмҥэ Гаврилга Mytona хампаанньа төрүттээччилэрэ ини-бии Ушницкайдар сылдьаллара. «Дьокуускайга олорон бүтүн аан дойдуга үлэлиибит» дииллэрин сэргии истибитэ. Мобильнай сыһыарыы оҥорор санаа күөдьүйбүтэ. Аҕыс филиалы салайар эттэххэ дөбөҥ. Аны сөптөөх аһылык арааһын атыылыыр буолбуттара, кэрэ буолуу салонун арыйбыттара. Мобильнай сыһыарыытыгар «өҥөйөн» эрэ ылара.

Онтон... аан дойдуну атыйахтыы аймаабыт хамсык саҕаламмыта. Урбааҥҥа уустук кэм бүрүүкээбитэ. Икки филиал тута тохтообута. Эдэр урбаанньыт саҥа хайысхалары көрдөөбүтэ. Сайклларын дьиэҕэ дьарыктанааччыларга куортамҥа биэртэлээбитэ. Өрөспүүбүлүкэтээҕи акселераторга үөрэммитэ. Аны ити кэмҥэ Москваҕа франшизалар быыстапкаларыгар кыттан, 2 күн иһигэр 40 сайаапканы хомуйбута – о.э. 40 куорат «Bodyline» филиалын арыйарга бэлэмин биллэрбитэ. Онтон кынаттанан кэлбитэ, «Акселераторга түһүмэҕи аастыҥ, өрөспүүбүлүкэ хампаанньаҥ 5%-нын 2 мөл. солк. атыылаһар буолла» диэбиттэрэ. Икки куобаҕы сырсар сатаммат диэн санааттан франшизаны арыйыыны тохтоппута.

Ханнык баҕарар үлэ ис хоһоонноох

Урбаан эйгэтэ түһүүлээх-тахсыылаах, ону Гаврил элбэхтэ билбитэ. 2022 с. мобильнай сыһыарыылара санкцияҕа түбэһэн, 2019 сылтан мунньубут баазаларыттан ытыс соттубуттара. Онон Арассыыйа серверигэр суһаллык көһөргө күһэллибиттэрэ, сыһыарыыларын саҥаттан оҥорбуттара.

– Килийиэн уонна тренер туһанарыгар табыгастаах гына оҥорбуппут. Холобур, килийиэн билигин тугу аһыы олорорун, бүгүҥҥү туругунан ыйааһына төһө түспүтүн, үлэбит уопсай түмүгүн барытын көрө, хонтуруоллуу, эбии сорудах биэрэ олоробут. Билиҥҥи туругунан, атын куораттары ааҕан туран, 400-тэн тахса тренер туһанар. Өссө сыһыарыыбыт оҥоһуу өйүнэн үлэлиирин ситиспиппит – аһылыккын хаартыскаҕа түһэрэн уктаххына, КБЖУ-тун ааҕан таһаарар. Нуормаҕыттан таҕыстаххына, «уойан эрэҕин» диэн сэрэтэн кытарар. Инникитин Арассыыйаны баһылыыр баҕалаахпыт.  

Гаврил этэринэн, сорох артыыстар сулустуу суһумнаан баран, олус түргэнник «умуллан» хаалаллар. Таһымы тута сылдьааччы аҕыйах. Урбааҥҥа эмиэ оннук. Биир сиргэ тохтоон хаалбакка, саҥаттан саҥа саҕахтары арыйыах тустааххын.

– Ханнык баҕарар үлэ ис хоһоонноох, миссиялаах буолуохтаах дии саныыбын. Ол баар – эйигин хамсатар күүс. Биһиги дьон ырарыгар, доруобуйатын көрүнэригэр, көннөрүнэригэр, туруга тупсарыгар көмөлөһөбүт.

Олох хаачыстыбата тупсан иһэр, ону кытта уойуу сыл аайы элбии турар. Хамсаммат киһи кырдьан барар. Аһы-үөлү сөпкө көрүнэн, дьарыгы кытта дьүөрэлээн, өрүү эдэрдии эрчимнээх сылдьыахха сөп.

«Bodyline» араас марафоннары ыытар, «Трансформация» диэн кэрэ аҥаардарга аналлаах бырайыага 15-с сезона буолла. Ону сэргэ аһымал аахсыйалары өйүүр, тулаайах, доруобуйаларыгар хааччахтаах оҕолору кытта шефтэһэр.

– Ыарахаттарга бэриммэккэ, салгыы барар үүтү-хайаҕаһы көрдүүр туһунан толкуйдуохтааххын. Кыра-кыра хардыынан улахан сыалы ситиһэҕин.  Сатаан былааннаммат, киэҥник көрбөт киһи ырааппат. Үлэни, сынньалаҥы, дьиэ кэргэни, доҕоттору дьүөрэлии үөрэниҥ, – диэн Гаврил Винокуров соргулаах сүбэтинэн кэпсэтиибитин түмүктүүбүт.