Гагаринскай уокурукка бэтэрээннэри чиэстээһин буолла

Гагаринскай уокурук бэтэрээннэрин ыам ыйын 5 күнүгэр Юрий Гагарин аатынан сквергэ чиэстээһин Аляска-Сибиир салгын трассатын лүөччүктэригэр аналлаах пааматынньыкка сибэкки дьөрбөтүн уурууттан саҕаланна.

Куорат баһылыгын солбуйааччы Антон Алексеенко бэлиэтээбитинэн, маннык тэрээһиннэр Кыайыыны уһансыбыттарга сүгүрүйүүнү биллэрэр уонна эдэр көлүөнэҕэ история чахчыларын тиэрдэр аналлаахтар.

Уокурук дьаһалтатын салайааччыта Евгений Сидоренко бэйэтин эҕэрдэ тылыгар Дьокуускай куорат Улуу Кыайыы 80 сыллаах үбүлүөйүн үрдүк таһымҥа бэлиэтииргэ бары кыһамньытын уурара бэтэрээннэргэ махтал бэлиэтэ буоларын санатта. Итиэннэ бу күннэргэ Владимир Путин ыйааҕынан иҥэриллибит «Килбиэннээх үлэ куората» үрдүк аакка аналлаах аарка арыллаары турарын, Гагарин аатынан сквер рейтиннээх куоластааһыны ааһан оҥоһулларыгар баҕа санаатын эттэ.

Бу күн уокурук бэтэрээннэригэр Кыайыы 80 сылынан үбүлүөйдээх мэтээллэри туттардылар. Бырааһынньык Юрий Гагарин аатынан Аныгы култуура уонна искусство киинин кэлэктиибин күүһүнэн кэнсиэринэн, саллаат куухунатынан, ону кытта сөмөлүөт аһылыгынан – балыктаах, кууруссалаах, эттээх күндүлээһининэн түмүктэннэ, диэн Олохтоох дьаһалта пресс-сулууспата иһитиннэрэр.