Гаас хочуолун тэхиньиичэскэй хааччыйыы сорох көрүҥүн тарыыба кулун тутар 1 күнүттэн намтаата

«Сахатранснефтегаз» хампаанньа гаас хочуолун тэхиньиичэскэй хааччыйыы сорох көрүҥүн тарыыбын кулун тутар 1 күнүттэн намтатта. Тарыыбы хаттаан көрүү төрүөтүнэн федеральнай методическай рекомендациялар буоллулар.

Ол курдук, чааһынай дьиэҕэ турар вентилятор горелкалаах 30 кВт диэри кыамталаах хочуолларга (сүрүннээн истиэнэҕэ ыйанар) тарыып 8 000 солк. эбит буоллаҕына, кулун тутар 1 күнүттэн 4 800 солк. диэри намтаата. Атмосфернай горелкалаах 30 кВт диэри кыамталаах хочуол (сүрүннээн сиргэ турар хочуоллар) тэхиньиичэскэй хааччыйыытын тарыыба 5 270 уонна 4 550 солк. эбит буоллаҕына, кулун туттар 1 күнүттэн 4 520 солк. тэҥнэстэ. 

Холобур быһыытынан ыллахха, гаас оһоҕун кыамтатыттан, көрүҥүттэн көрөн, тэхиньиичэскэй хааччыйыы чааһынай дьиэҕэ 10 010 солк. эбит буоллаҕына, кулун тутар 1 күнүттэн 7 270 солк. тэҥнэһэн турар, намтааһын – 2 740 солк. 

Саҥа методиканан, гаас билиитэтин тэхиньиичэскэй хааччыйыы өҥөтүн сыаната үрдээбит. Холобура, түөрт харахтаах (горелка) билиитэни хааччыйыы инники 1 180 солк. буоллаҕына, кулун тутар 1 күнүттэн – 1 400 солк.

Санатар буоллахха, РФ тутууга уонна олох-дьаһах, хомунаалынай хаһаайыстыба министиэристибэтин методическай ыйынньыгынан 2025 сыл кулун тутар 1 күнүттэн түөрт харахтаах гаас билиитэтин тэхиньиичэскэй хааччыйыы сыаната 3 573 солк. ыйыллан турар. Ол эрээри олохтоох хампаанньа ыйыллыбыт тарыыбы нэһилиэнньэ ноҕуруускатын намтатар сыалтан тутуспат туһунан быһаарыыны ылынна. 

Бэлиэтээн эттэххэ, бу иннинэ дьиэ иһигэр турар гаас хочуолун тэхиньиичэскэй хааччыйыы уопсай суумата гаас оһоҕун кыамтатыттан уонна көрүҥүттэн тутулуктанан (түөрт харахтаах плита, духуопка, 30 кВт диэри кыамталаах хочуол, кыбартыыра иһинээҕи разводка) элбэх кыбартыыралаах олорор дьиэҕэ 8 320 солк. эбит буоллаҕына, 2025 сыл кулун тутар 1 күнүттэн 7 220 солк. диэри, ол эбэтэр 1 100 солк. намтаан турар.

Саҥа тарыыптар туһунан сиһилии тэрилтэ официальнай сайтыгар билсиҥ: https://aostng.ru/fizicheskim-litsam/consumer-information/tekhnicheskoe-obsluzhivanie-i-remont-gazovogo-oborudovaniya/preyskurant-tsen-na-uslugi/

«Сахатранснефтегаз» АУо нэһилиэнньэ ороскуотун кээмэйин намтатар сыалтан маны сэргэ кэмиттэн кэмигэр «прощённые дни» аахсыйалары ыытар, диэн иһитиннэрэр «Сахатранснефтегаз» пресс-сулууспата.

Хаартыска: СТНГ