Фронтан илдьэ кэлбит

Макар Стручков, V «Б» кылаас үөрэнээччитэ:

– Мин хос эһэм Никита Михайлович Левин – Аҕа дойду Улуу сэриитин кыттыылааҕа. Кини 1922 сыллаахха от ыйын 15 күнүгэр Кэбээйи сэлиэнньэтигэр төрөөбүт. 1942 сыллаахха бэс ыйын 16 күнүгэр Кыһыл Аармыйа кэккэтигэр ыҥырыллыбыт.

Никита Михайлович бойобуой суола 1942 сыллаахха Хотугу Кавказтан саҕаламмыт уонна Украинаны, Белоруссияны, Польшаны ааһан, Берлиҥҥэ тиийэн түмүктэммит. Кини бастаан связиһинэн сылдьыбыт, кэлин үрдээн, старшай связист-телеграфист буолбут, командование Сталины кытта сибээһин хааччыйар эбит. Хос эһэм Берлини босхолообуттарын кэннэ Рейхстаг истиэнэтигэр  «Здесь был Никита Михайлович Левин из Якутии» диэн суруйбут. Никита Михайлович связист быһыытынан Потсдамҥа эйэ дуогабарыгар илии баттааһыҥҥа кыттыбыт. Хос эһэм 1948 сыллаахха демобилизацияламмыт. Элбэх наҕараадалаах.

Никита Михайлович сэриигэ ыксаллаах быһыыга көмүскэнэргэ диэн укта сылдьыбыт ботуруонун фронтан илдьэ кэлбит. Ону олоҕун тиһэх күнүгэр диэри бырахпакка, сэрии уоттаах сылларын санатар өйдөбүнньүк оҥостубут. Билигин ол биһиэхэ харалла сытар. Өссө хос эһэм фроҥҥа туттубут флягата баар. Хос эбэбит сундуугар сыппытын булан ылбыппыт. От күөҕэ өҥнөөх уонна тирии суумкалаах эбит.

Биһиги дьиэ кэргэммит өссө биир реликвията – хос эһэм балалайката. Онно кини күн аайы кэриэтэ сөбүлээн оонньуура. Сыаната 3 солкуобай 50 харчы эбит. Мин хос эһэм балалайкатыгар оонньоон көрбүтүм, «В траве сидел кузнечик» ырыаны ыллаабытым. Эргэ балалайка сорох сиринэн элэйбит да буоллар, билигин да бөҕө туруктаах. Струналара уларыйбатах, уруккулара сылдьар.