Физико-техническэй лицей саҥа дьиэтин бастакы сыбаайата түстэ

Саха сирин Ил Дархана Айсен Николаев бэйэтин «Макс» ханаалыгар иһитиннэрбитинэн, Дьокуускайга Владимир Ларионов аатынан Физико-техническэй лицей саҥа дьиэтин тутуу 2027 сыл бүтүүтэ түмүктэниэхтээх; бүгүн, ыам ыйын 27 күнэ – бастакы официальнай саҕалааһын быһыытынан биллэрилиннэ. 

«Физико-техническэй лицей — барыбыт киэн туттуубут. Тэриллиэҕиттэн кэлэктиип талааннаах оҕолору кытта үлэҕэ үрдүк таһымнаах былааны ылынна уонна ол сыалын бу сылларга чиҥник тутуһар. Лицей Арассыыйа бастыҥ оскуолаларын ахсааныгар киирэр, “РНА Базовай оскуолата”статуһун сүгэр, өрөспүүбүлүкэ IT-оскуола сайдыытын киинин быһыытынан биллэр. Манна наукаҕа, инженерияҕа, программированиеҕа уонна чинчийэр үлэҕэ оҕолор дьоҕурдара арыллар ураты эйгэ тэриллибит. Чопчу маннык оскуолалар Саха сирин интеллектуальнай күүһүн төрүттүүллэр», — диэн суруйбут Айсен Николаев.

Дьиэ уопсай иэнэ 8,6 тыһыынча квадратнай миэтирэ, үс мэндиэмэннээх буолар. Эбийиэк «Все лучшее детям» федеральнай бырайыагынан тутуллар. Уопсайа 500 миэстэлээх буолуоҕа. Билигин лицейгэ 5-тэн 11-с кылааска диэри 432 оҕо үөрэнэр.

Хаартыска: СИА