Эйфель башнятын игирэлэрэ

Ол курдук, аҕыс сыл анараа өттүгэр “Мин Парижка баарбын» диэн суруктаах хаартыскалар куйаар ситиминэн тилийэ көппүттэрин элбэх киһи соһуйа көрбүттээҕэ.

Ол ханна, хайдах туохтан саҕаламмытын «Киин куорат» Томпо улууһугар сибээскэ тахсан биллэ.

Юрий Юрьевич Комиссаров, "Мэҥэ Алдан нэһилиэгэ" муниципальнай тэриллии баһылыга:

– 2017 сыллаахха СӨ ОДьКХ министиэристибэтэ тупсарыыга куонкурус биллэрэн, нэһилиэк дьокутааттарын кытта сүбэлэстибит. Арай биир сарсыарда Оҕо искусствотын оскуолатын учууталынан үлэлээн ааспыт Роман Романович Ефимов миэхэ «Эйфель башнятын тутуохха” диэн идеялаах киирдэ. Бастаан олус дьиктиргии иһиттэҕим дии. Соһуччу этэ. Ол эрэн кини «Семь чудес света» диэн дьоҕус паарка курдугу оҥорор ыра санаалааҕын эрдэттэн истэр этибит. Роман Романовичка сонно тута: «Эн үөрэнээччиҥ Максим Неймоховы кытта сүбэлэһиэм. Архитектор уолбут санаатын истиэххэ, сүбэлиэ-амалыа», – диэн тылбын биэрдим.

Хаартыскаҕа: Максим Неймохов (хаҥастан), Юрий Комиссаров (уҥаттан) 

Онон дизайн-бырайыак кэпсэтэ Максим Неймоховка Санкт-Петербурга тиийэн, чертеж, онтон смета оҥоһуллан, куонкурус биллэриллэн, үлэ саҕаламмыта. Куонкуруһу Дьокуускай куораттан «Северагромонтаж” тэрилтэ кыайбыта. Мичил Бурнашев биригэдьиирдээх Кэбээйи уолаттара үс буолан сыбааркатын оҥорбуттара. Макет оҥоһуллан саҕаламмыт бастакы күнүттэн Мэҥэ Алдаҥҥа кэлэн туруор диэри биир төгүрүк сыл үлэлээбиттэрэ. Хомойуох иһин, идея ааптара Роман Ефимов бу сүҥкэн үлэни тыыннааҕар баттаспатаҕа.

Хаартыскаҕа: «Северагромонтаж" тэрилтэ үлэтин түмүктүүр түгэнэ 

Билигин пааматынньык нэһилиэк биир биллэр-көстөр, кэрэхсэбиллээх сирэ буолла. Томпо хайаларыгар, Өймөкөөҥҥө айаннаан иһэр туристар хайаан да тохтоон, хаартыскаҕа түһэн ааһаллар.

Мэҥэ алданнар биир киэн туттуубут – саха норуодунай суруйааччыта Е.П. Неймохов түмэлэ, Томпо оройуонун суруйааччыларын скверэ. Эйфель башнятын Роман Романович кэллиэгэлэрэ, Оҕо искусствотын оскуолатын үлэһиттэрэ, көрөллөр-истэллэр, ыраастыыллар, сайынын сибэкки олордоллор.
 

Мэҥэ Алдаҥҥа турар Эйфель башнята:

Үрдүгэ: 16 м

Сакаасчыт: Томпо, «Мэҥэ Алдан» МТ

Бырайыагы көҕүлээччи: Ефимов Роман Романович

Бырайыак ааптара: Неймохов Максим Петрович

Бэдэрээччит: «Североагростроймонтаж» ХЭУо

Туттарыллыбыт күнэ: Балаҕан ыйын 14 күнэ, 2018 сыл

Эйфель башнята Саха сиригэр өссө ханна баарый?