Эйэ, дьол ырыаһыта

«Киин куорат» таһаарыыга анаан Любовь Николаевна Сидорова, оскуола түмэлин салайааччыта: 

– Биир дойдулаахтарбыт Петр Тобуруокап, Мария Константинова Георгий Никифоровтыын бииргэ үлэлээбит дьон. Хара Лааҥкы эмиэ кинилэртэн эдэрдэрэ. Онон Үөһээ Бүлүү Нама – билиҥҥэ диэри уостан түспэккэ ылланар норуот сөбүлүүр элбэх ырыата биһиктэнэн тахсыбыт сирэ.

Георгий Максимович Никифоров «Этимэ ый үөһэ устарын», «Көтөн тахсыҥ кыталыктар», «Өлүөнэ эбэкэм», «Кимий диибин», «Ытанньах дьоруой буолбат» курдук ырыаларын аныгы толорооччу элбэх.
Оттон бүгүн Степан Тимофеев тылларыгар «Эйэ, дьол иhин» ырыатын хос сиэннэрэ хорга таһаарбыттарын олохтоохтор олус долгуйа иһиттибит. Кэнсиэр Георгий Никифоров «Мин саллаат уолабын» диэн бэйэтэ суруйбут хоһоонуттан саҕаланна. Кини 150 айбыт ырыатыттан турбут кэнсиэркэ дьыссаат саастаахтан кырдьаҕастарга тиийэ кытыннылар.

Биир дойдулаахтарбыт ылсыбыт дьыалаларыгар бэриниилээхтэрин история биир чахчыта кэрэһилиир. Ол курдук 60-с сылларга Дьокуускайга олунньу ыйга массыынанан тиийэн, «Барахов ыччата ыллыыр» диэн кэнсиэри көрдөрөн кэлэллэр. Бу айан тэлэбиидэнньэҕэ уһуллубут. Историяҕа киирбит ол толоруу кыттыылаахтарын сыдьааннара бүгүҥҥү хорга ыллаатылар. Ол аата көлүөнэ ситимэ быстыбат.

Тэрээһин биир суолталаах түгэнинэн Георгий Никифоров олорбут дьиэтигэр мемориальнай дуоска ыйаммыта буолла. Нэһилиэк баһылыга Александр Кардашевскай, композитор кыргыттара Евдокия, Георгианна Георгиевналар, кийиит Ульяна Николаевна, сиэн Денис Никифоров арыйдылар.

Оскуола үөрэнээччилэрэ түөһүгэр Нам нэһилиэгиттэн сэриигэ барбыттар ааттара суруктаах футболкалаах «Кыайыы пробегар» кытыннылар.

Бу курдук биир дойдулаахпыт, улуу композитор Грант Григорян үөрэнээччитэ, буойун, мелодист, самодеятельнай композитор Георгий Максимович Никифоров оҕолоро, сиэннэрэ, хос сиэннэрэ кыттыылаах улахан тэрээһин буолан ааста.