31.01.2025 | 12:19

Евгений Григорьев «Якутскэнерго» үлэһиттэригэр отчуоттаата

Евгений Григорьев «Якутскэнерго» үлэһиттэригэр отчуоттаата
Ааптар: Киин Куорат
Бөлөххө киир

Тохсунньу 30 күнүгэр баһылык Евгений Григорьев Олохтоох дьаһалта 2024 сыллааҕы үлэтин түмүгүнэн уонна үүммүт 2025 сылга былааннарынан «Якутскэнерго» ПАУо үлэһиттэригэр отчуоттаата.
Отчуоту тэрилтэ генеральнай дириэктэрэ Гаврил Алексеев салайан ыытта.
Евгений Григорьев энергетиктэргэ ааспыт сыл икки бөдөҥ уопсастыбаннай-политическай түгэнин санатта – дойду баһылыгын быыбарыгар Дьокуускай куорат нэһилиэнньэтин 82% Владимир Путины талбытын уонна дойду бэрэсидьиэнэ Дьокуускай куоракка кэлэн барбытын.
Отчуот биир сүрүн хайысхата – 2024 сылтан саҕаламмыт дойду баһылыга Владимир Путин өйөбүлүн ылбыт Дьокуускай куорат маастар-былаана. Ол чэрчитинэн үс бөдөҥ уопсастыбаннай туона үлэҕэ киирбитэ бэлиэтэннэ – Ленин болуоссата, Р.М. Дмитриев аатынан кытыл уонна Сайсары эбэ кытыла. Өлүөнэ күргэтин тутуу, «Ленские высоты», «Спортивнай», «Звездный» түөлбэлэри тутуу эмиэ тэтимнээхтик барбыттара бэлиэтэннэ.
Ити курдук 2030 сылга диэри Дьокуускай куорат маастар-былаанынан 90 бырайыак олоххо киириэхтээх. 
Дьоһун болҕомто демографическай политикаҕа уурулунна. Бүгүҥҥү күҥҥэ нэһилиэнньэбит ахсаана 389 тыһыынчаҕа тиийэн, Дьокуускай куорат Уһук Илин регионугар демографияны сайыннарыыга инники кэккэҕэ турар.


Нэһилиэнньэ ахсаана элбиирэ куорат бүддьүөтүн кытта ыкса ситимнээх. Ол курдук, ааспыт сылга бүддьүөт иэнэ 34 млрд солк. тиийэн, рекорднай көрдөрүүнү ситиспит; ол иһигэр: 14 млрд 600 мөл. солк. – куорат тус дохуота, оттон ороскуот 63% – социальнай хайысхалаах тэрээһиннэр.
2024 сылга дойду баһылыга Владимир Путин көҕүлээһининэн олоххо киирбит национальнай бырайыактар алта сыллаах цикллара түмүктэммитэ. Дьокуускай куорат 2019 сылтан 6 нацбырайыакка кыттан, 26,4 млрд солк. туһаҕа таһаарбыт; ол иһигэр: 2,5 млрд солк. – тус бүддьүөтэ, 12 млрд солк. – өрөспүүбүлүкэ бүддьүөтэ, 11,9 млрд солк. – федеральнай бүддьүөттэн түспүт харчы.
«Үөрэхтээһин» нацбырайыак көмөтүнэн 7 оскуола биир симиэнэҕэ көстө. «Олорор дьиэ уонна куорат эйгэтэ» бырайыагынан хаарбах дьиэттэн көһөрүү, тиэргэннэри, Сайсары эбэ кытылын, Ф.К. Попов аатынан сквери тупсарыы, «Воинская часть» кыбаартал уулусса-суол ситимин оҥоруу о.д.а. ыытыллыбыта. «Куттала суох уонна хаачыстыбалаах суоллар» бырайыагынан 2019 сылтан уопсайа 195 км, ол иһигэр 2024 сылга 31 км усталаах суол нуормаҕа хоруйдуур турукка тиэрдиллибитэ. Суолу оҥоруу иитинэн 112 км тротуар, 15 км кэриҥэ усталаах бэлисипиэт суола оҥоһуллан, 4 тыһ. кэриҥэ уулусса лаампата туруоруллан, суолга саахал тахсыыта аҕыйаабыта бэлиэтэннэ. 
2024 сылга саҕаламмыт уопсастыбаннай тырааныспар ситимин уларыта тутуу, инфраструктураны, куорат эйгэтин тупсарыы, элбэх оҕолоохтору сир учаастактарынан хааччыйыы, култуура, спорт, урбаан эйгэлэрин ситиһиилэрэ, арыгы атыытын утары үлэ хамсаабыта, анал байыаннай дьайыы кыттыылаахтарыгар оҥоһуллар өйөбүл миэрэлэрэ болҕомто кииниттэн тахсыбатылар. 
Улуу Кыайыы 80 сылыгар ананар 2025 сылга бу үлэ барыта салҕанар, ол иһигэр Кыайыы пааркатын тутуу, элбэх оҕолоохторго бэриллибит сирдэри инженернэй ситимнэргэ холбооһун, социальнай гаастааһын, «Белое озеро» түөлбэни уонна Марханы уунан хааччыйыы ыытыллыахтара. 
Отчуот кэнниттэн баһылык үгэс быһыытынан тэрилтэ үлэһиттэрин ыйытыыларыгар хоруйдаата. Энергетиктэр уопсастыбаннай тырааныспар үлэтин, уулусса, тиэргэн өрөмүөнүн, ол иһигэр Сэбиэскэй Аармыйа 50 сыла уулусса өрөмүөнүн ыйыталастылар. 
Кэлиҥҥи кэмҥэ сытыытык дьүүллэһиллэр 1 №-дээх Оҕо искусствотын оскуолатын атын дьиэҕэ көһөрүү туһунан ыйытыыга Евгений Григорьев ДШИ бүгүн үлэлии олорор дьиэтигэр хапытаалынай өрөмүөн ирдэнэринэн быһаарда. Бу эбийиэк Ыччат министиэристибэтигэр бэриллэн, патритотическай хамсааһыны өйүүргэ көрүллэр үп суотугар өрөмүөннэниэхтээх. Оттон 1 №-дээх ДШИ, анал дьиэ тутуллуор диэри, быстах кэмҥэ «Бригантинаҕа» көһөрө быһаарыллыбытын санатта.
«Якутскэнерго» ПАУо кэлэктиибэ баһылык отчуотун үчүгэйинэн сыаналаата, диэн Олохтоох дьаһалта пресс-сулууспата иһитиннэрэр.

Сонуннар

Ордук ааҕаллар

Екатерина Семенова: «Ылдьаананы аһынным ээ...»
Дьон | 08.02.2025 | 12:00
Екатерина Семенова: «Ылдьаананы аһынным ээ...»
Бу күннэргэ «Саха» НКИХ көрөөччүлэрэ «Уот Дьулустаан» диэн саҥа сериалынан олоробут диэтэххэ, омун буолбатах. Киэһэ аайы: «Киинэбит кэлэрэ чугаһаата», – диэн бассаап бөлөхтөр оргуйа түһэллэр. Саҥа сериалга киҥнээх, кырыктаах Ылдьаана хотун оруолун чаҕылхайдык толорбут Екатерина Семенова көрөөччү киэҥ биһирэбилин ылла.   Бүгүҥҥү сэргэх сэһэргэһээччибит –  СӨ Үүнэр көлүөнэтин тыйаатырын артыыһа, СӨ...
Саргылан Семенов: «Паралимпиада кыһыл көмүһүн ылларбын...»
Дьон | 01.02.2025 | 11:00
Саргылан Семенов: «Паралимпиада кыһыл көмүһүн ылларбын...»
Кини – 25 саастаах эдэр киһиэхэ олох ыараханын, аһыытын-ньулуунун билбит, ол охсууттан самныбатах, күүстээх санаалаах, сахалыы мындыр толкуйдаах, саастаах да дьоҥҥо холобур буолар киһи киэн туттар дьоруойа.   – Саргылан, бастатан туран, бэйэҥ тускунан билиһиннэриэҥ дуо? – 1999 сыллаахха Уус Алдан улууһун киинигэр Бороҕоҥҥо төрөөбүтүм, улааппытым, оҕо, эдэр сааһым барыта онно...
Саха түмэлигэр ураты быыстапка турда
Сонуннар | 07.02.2025 | 22:12
Саха түмэлигэр ураты быыстапка турда
Саха АССР оскуолаларын 1985 сыллааҕы выпускниктара быйыл оскуоланы бүтэрбиттэрэ 40 сылын туолар. Кыайыы 40 үбүлүөйдээх сылыгар Саха сирин оскуолаларын бүтэрбит  тыһыынчанан оҕо бүгүн бэйэлэрэ олохторун орто омурҕанын ааһан, үүнэр көлүөнэни, эдэр ыччаты дойдуга тулхадыйбат таптал, бэриниилээх буолуу тыыныгар үлэлэһэр ытыктанар дьон. Кинилэр бу үтүө дьулуурдара атыттарга холобур эрэ буолар аналлаах....