Евгений Григорьев волонтёрдарга махтанна

Баһылык быйыл сөҕүмэр түмүк ситиһиллибитин, Дьокуускай куорат 45 400 куолаһы биэрэн, туруоруллубут сорук туолбутун тоһоҕолоон бэлиэтээтэ. Бэлиэтээн эттэххэ, былырыын Дьокуускай куорат олохтоохторуттан 34 тыһыынча куолас ирдэммит буоллаҕына, быйыл былаан 30% үрдээн, 45 тыһыынчаҕа тиэрдилибитэ. Евгений Григорьев манан сибээстээн Дьокуускай куоракка тутуллар эбийиэктэри үбүлээһин кээмэйин үрдэтэргэ регион бырабыыталыстыбатын кытта үлэни ыытарга соруйбута.

Былааны толоруу, элбэх куолаһы ситиһии тугу биэрэрий? Холобур, ааспыт сылга куорат олохтоохторо эмиэ элбэх куолаһы биэрэннэр, икки эбийиэги оҥорор кыах үөскээбитэ. Чуолаан Юрий Гагарин аатынан сквер уонна Водянова былаһаакката диэн аатынан биллэр туона муҥутуур элбэх куолаһы ыланнар, быйыл тутуллаары тураллар.

Куоластааһын ыытылларыгар көхтөөх үлэни ыыппыт волонтердарга баһылык махтал суруктары уонна грамоталары туттарда, диэн Олохтоох дьаһалта пресс-сулууспата иһитиннэрэр.

Санатар буоллахха, быйыл куоластааһыҥҥа 9 бырайыак турбута. Куоластааһын муус устар 21 күнүттэн бэс ыйын 12 күнүгэр диэри ыытыллыбыта.

Куоластааһыҥҥа турбут бырайыактар:

1. Доруобуйа харыстабылын үлэһиттэрин искибиэрэ

Аадырыһа: Киин уокурук

2. «Собачье счастье» уопсастыбаннай туона

Аадырыһа: 202-с түөлбэ

3. 1941-43 сс. Ржев куорат иһин кыргыһыыга охтубут буойуннарга аналлаах искибиэр

Аадырыһа: Хабаров уул., 11

4. Сэргэлээх күөлүн кытыла

Аадырыһа: ДСК түөлбэтэ, Сэргэлээх күөлэ

5. Алмаасчыттар искибиэрдэрэ

Аадырыһа: Сайсары уокуруга, Лермонтов уул.

6. Щорс күөлүн кытыла (1-кы түһүмэх)

Аадырыһа: Щорс күөлэ

7. «Дьол аартыга» этнокомплекс («Ытык сир» паарка 2-с түһүмэҕэ)

Аадырыһа: Гагаринскай уокурук

8. Речниктэр искибиэрдэрэ

Аадырыһа: Губинскай уокурук, Бестужев-Марлинскай уул., 2

9. 203-с түөлбэҕэ кытылы тупсарыы

Аадырыһа: 203-с түөлбэ

***

«Куорат сиригэр табыгастаах эйгэни тэрийии» бырайыак көмөтүнэн Дьокуускай куоракка 2018 сылтан 11 уопсастыбаннай туона оҥоһулунна. Бу барыта – куорат олохтоохторо көхтөөхтүк куоластаабыттарын түмүгэ.