Евгений Григорьев Үүт собуотун үлэһиттэрин иннигэр отчуоттаата

Олохтоох дьаһалта 5 сыллаах үлэтин түмүгүнэн үлэ кэлэктииптэрин иннигэр отчуоттар салҕаналлар. Бүгүн, алтынньы 23 күнүгэр, куорат баһылыга Евгений Григорьев «Дьокуускайдааҕы үүт собуота» ХЭУо сырытта.
Баһылык отчуота олох бары эйгэтин хапта: дьэллик сылгылары туруорар анал стоянкаттан саҕалаан, хаарбах уонна саахалланар туруктаах дьиэлэртэн көһөрүүгэ тиийэ. Өрөспүүбүлүкэ киин куоратын нэһилиэнньэтэ 391 тыһыынча киһиэхэ тиийэн, Уһук Илиҥҥэ инники күөҥҥэ турарбыт бэлиэтэннэ. 
Евгений Григорьев маны сэргэ дойду баһылыгын биһирэбилин ылбыт куорат маастар-былаанын уонна нацбырайыактар тула иһитиннэриини оҥордо.
Отчуот кэнниттэн үгэс быһыытынан ыйытыыларга хоруйдааһын буолла. Ол курдук Үүт собуотун үлэһиттэрэ Воинскай уонна Рыдзинскай уулуссаларга оҕо былаһааккаларын өрөмүөнүн, 14 №-дээх оптуобус маршрутун уларытыы, Хабаров уулуссатыттан 203-с түөлбэҕэ тахсар муоста, 2-с Набережнайы сырдатыы, тиэргэннэри тупсарыы, Верхоянскай уулусса өрөмүөнүн, Объездной шоссеҕа уу сүүрдэр лотоктар тула ыйыталастылар, Ленин проспегар быраҕыллыбыт тутуу дьылҕатын сурастылар. 
Киирбит ыйытыылар бары боротокуолга тиһилиннилэр, диэн Олохтоох дьаһалта пресс-сулууспата иһитиннэрдэ.