Евгений Григорьев Ойуунускай уулуссатыгар хапытаалынай өрөмүөн хаамыытын бэрэбиэркэлээтэ
Дьокуускай куорат баһылыга Евгений Григорьев Ойуунускай уулуссатыгар (Каландаришвили уулуссатыттан Петровскай уулуссатыгар диэри суол кэрчигэр) хапытаалынай өрөмүөн хаамыытын бэрэбиэркэлээтэ.
Ол курдук, этиллибит учаастакка канализация ситимэ ааһар турбаларын ууран бүтэрэн эрэллэр. “Муус Хайа” эрэстэрээн утары туһааннаах үлэни “Водоканал” АУо ыытар.
Алтынньы 9 күнүнээҕи туругунан Ойуунускай уулуссатыгар Дежнев уулуссатыттан Петровскай уулуссатыгар диэри суол кэрчигэр ууну аһардар турбалары ууран бүтэрбиттэр. Маны сэргэ, Дежнев уулуссатыттан Каландаришвили уулуссатыгар диэри учаастакка аспаал үөһээҥҥи дьаптаҕата ууруллубут. Сайсары күөл муостатыттан Каландаришвили уулуссатыгар диэри суол кытыытыгар таас, тротуар билиитэтин уураллар.
Каландаришвили уулуссатыттан Петровскай уулуссатыгар диэри учаастакка сибээс ситимэ, ууну аһардар турба уонна гаас ситимин икки футляра ууруллубут.
Бэлиэтээн эттэххэ, Ойуунускай уулуссатыгар Дежнев уулуссатыттан Октябрьскай уулуссатыгар диэри суол кэрчигэр киэҥ далааһыннаах үлэ “Олох инфраструктурата” национальнай бырайыак иитинэн ыытыллар. Бэдэрээтчит – “Дороги Саха” тэрилтэ.
Арассыыйа Бэрэсидьиэнэ Владимир Путин көҕүлээһининэн олоххо киирэр “Олох инфраструктурата” саҥа национальнай бырайыак чэрчитинэн быйыл Дьокуускайга уулусса-суол ситимин 11 эбийиэгэр үлэ барар, барыта 14,1 км суол өрөмүөннэниэҕэ.
Муниципальнай сакаасчыт – Дьокуускай куорат “Главстрой” муниципальнай хааһына тэрилтэтэ.
Хаартыскалар: yakutskcity.ru
Сонуннар
Ордук ааҕаллар
