Евгений Григорьев оптуобус суоппардарын 2 %-наах ипотекаҕа киллэрэри туруорсар

Дьокуускай куорат баһылыга Евгений Григорьев бу тэрээһиҥҥэ кыттан, уопсастыбаннай тырааныспар эйгэтигэр үлэһит каадырдары тутарга чэпчэтиилээх ипотека өйөбүл буолуон сөп диэн этии киллэрдэ, диэн ТАСС суруйар.

«Уһук Илин ипотекатын кэҥэтэр туһунан этиини кытта толору сөпсөһөбүн. Мин манна уопсастыбаннай тырааныспар суоппардарын эбэн биэрэри сөптөөҕүнэн ааҕабын. Биллэн турар, үгүстэрэ бүддьүөттэн хамнастанар исписэлиис буолбатахтар, чааһынай урбаан бэрэстэбиитэллэрэ. Уһук Илин регион баһылыктарын кытта бу хайысхаҕа кэпсэтиигэ барыларыгар кэриэтэ үлэһит илии тиийбэтэ биллибитэ. Тымныыга, Уһук Илин уустук усулуобуйатыгар үлэлии хаалааччы аҕыйах, үгүстэрэ Арассыыйа киин куораттарыгар көһөллөр», – диэн быһаарар Григорьев.

Санатар буоллахха, Уһук Илини сайыннарыы министиэристибэтин чахчытынан «Уһук Илин ипотеката» 2%-наах кирэдьиитинэн 2020–2025 сылларга Уһук Илин регионугар тутуллар саҥа дьиэ хас биирдии иккис кыбартыырата үлэҕэ киирбит.