Евгений Григорьев М.К. Аммосов аатынан ХИФУ кэлэктиибин иннигэр отчуоттаата

Олунньу 6 күнүгэр «Сэргэлээх уоттара» Култуура киинигэр куорат баһылыга Евгений Григорьев ааспыт 2024 сыллааҕы үлэ түмүгүнэн М.К. Аммосов аатынан ХИФУ кэлэктиибин иннигэр отчуоттаата. 
Баһылык 2024 сыл Дьокуускай куоракка үс бөдөҥ түгэнинэн өйдөнөн хаалбытын бэлиэтээтэ – дойду баһылыгын быыбара, VIII-с «Азия оҕолоро» НИСО уонна Дьокуускай куоракка Арассыыйа бэрэсидьиэнэ Владимир Путин кэлэн барыыта.

2024 сыл итини сэргэ дойду баһылыга Владимир Путин өйөбүлүн ылбыт куорат маастар-былаанын олоххо киллэрии бастакы сылынан биллэр. Ол курдук былырыын үс бөдөҥ уопсастыбаннай туона үлэҕэ киирбитэ – Ленин болуоссата, Р.М. Дмитриев аатынан кытыл уонна Сайсары эбэ кытыла. 2030 сылга диэри уопсайа 90 бырайыак олоххо киирэрэ былааннаммытыттан 23-нэн үлэ бара турар. 
Ааспыт 6 сылга Дьокуускай куоракка 6 национальнай бырайыак үлэлээбитэ. Барыта 5 үөрэх тэрилтэтэ тутуллубута, сотору кэминэн ДСК оройуонугар 990 миэстэлээх саҥа оскуола уонна Саха политехническэй лицейгэ салҕааһын үлэҕэ киирээри тураллар. Быйыл 7 үөрэх кыһата тутуллуоҕа.
15 тиэргэн өрөмүөнэ, 30 тыһ.кв/м иэннээх дьаама өрөмүөнэ  ыытыллыбыта, оптуобус саҥа 50 тохтобула туруоруллубута. Култуура уонна сынньалаҥ пааркатыгар, Арчы дьиэтигэр хапытаалынай өрөмүөн барбыта, Кыайыы пааркатыгар тупсарыы үлэтэ ыытыллыбыта, Федор Попов аатынан сквер тутуллубута, Орджоникидзе болуоссатыгар саҥа харыйа туруоруллубута.

Мустубут дьон баһылыктан Кэлэр көлүөнэлэр пааркаларын тутууну, хаарбах дьиэттэн көһөрүү бырагырааматын, 16 №-дээх оптуобус маршрутун уларытар кыалларын-суоҕун, доруобуйа харыстабылын тэрилтэлэрин таһыгар муниципальнай гостиницалар наадаларын, Ленин просп., 44 дьиэтин көтүрүү, Мединститут таһыгар уу ситимин тардыы болдьоҕун, 3 №-дээх оскуола суолун тутууну, Марха чааһынай секторыгар сайыҥҥы уу ситимин туһунан ыйыталастылар, диэн иһитиннэрэр Олохтоох дьаһалта пресс-сулууспата.