Евгений Григорьев Кыайыы 80 сылын тэрийэр хамыыһыйа мунньаҕын ыытта

Куорат дууматын бэрэссэдээтэлэ Альберт Семенов уонна куорат баһылыга Евгений Григорьев кыттыылаах Улуу Кыайыы үбүлүөйдээх 80 сылын тэрийэр хамыыһыйа уочараттаах мунньаҕа былааннаммыт тэрээһиннэри үбүлээһин боппуруоһун көрдө.
Кыайыы 80 сылынан былааннаммыт тупсарыы, өрөмүөн, тутуу үлэтэ, култуурунай-маассабай, сырдатар тэрээһиннэр сүрүннээн муниципальнай бырагыраамалар чэрчилэринэн куорат бүддьүөтүттэн үбүлэнэллэр. Өрөмүөн уонна тупсарыы үлэтин былааныгар Тыыл үлэһиттэрин уонна сэрии оҕолорун скверигэр Бочуоттаах олохтоохтор стелаларын саҥардыыга эбии үп көрүллүөҕэ, Гагарин уокуругар «Аэрокобра» сөмөлүөт өрөмүөннэниэҕэ.
Гериатрия киинигэр киирэр суол өрөмүөнүгэр үп булуохха наада, 2025 сылга дьаама өрөмүөнүн ыытар уонна сылаас тохтобулу туруорар кыах баар.
Кыайыы паркатагар үлэ салҕанар. Былааҥҥа эбии Аэропорт оройуонугар Бары сибэтиэйдэр храмнарын тупсарыы үлэтэ киирбит. 
Култуурунай тэрээһиннэр былааннарыттан 30 номнуо ыытыллыбыт.
Куорат уулуссаларын уонна тэрилтэлэр тастарын бырааһыньыктааҕы киэргэтии саҕаланна. Баһылык Евгений Григорьев мунньах түмүгүнэн былааҥҥа эбии киирбит тэрээһиннэри үбүлээһин боппуруоһун быһаарарга сорудахтаата, диэн иһитиннэрэр Олохтоох дьаһалта пресс-сулууспата.