Евгений Григорьев Кыайыы 80 сылыгар эбийиэктэри бэлэмнээһини бэрэбиэркэлээтэ

Евгений Григорьев Кыайыы 80 сылыгар эбийиэктэри бэлэмнээһини бэрэбиэркэлээтэ
Бүгүн куорат баһылыга Евгений Григорьев Аҕа дойду Улуу сэриитигэр Кыайыы 80 сылын бэлиэтиир сүрүн тэрээһиннэр ыытыллар эбийиэктэр бэлэмнэнэрин бэрэбиэркэлиир көһө сылдьар мунньаҕы ыытта. 

Бастакы эбийиэгинэн «Туймаада саллаата» мемориальнай комплекс буолла. Губинскай уокурук управатын салайааччыта Валентин Романов иһитиннэрбитинэн, эбийиэк ыам ыйын 4 күнүгэр бэлэм буолуоҕа. Ыам ыйын 7 күнүгэр манна норуокка «бэтэрээннэр дьиэлэринэн» биллэр элбэх мэндиэмэннээх дьиэ истиэнэтигэр мурал арыллыаҕа. Ыам ыйын 9 күнүгэр 11.30 ч. мемориалга сибэкки дьөрбөтүн ууруу кэнниттэн Эр санааланыы уруоктара  ыытыллыахтара. Тэрээһиннэргэ уокурук оскуолаларыттан үс сүүсчэкэ оҕо кытттыыны ылыаҕа. Эр санааланыы уруогар светодиод экран туттуллуоҕа.

Иккис эбийиэгинэн Кыайыы Болуоссата буолла. Болуоссат стелата кырааскаланыахтаах, ыскамыайкалар, урналар бары саҥардыллыахтаахтар, барельефтар сууйуллаллар. Маны сэргэ саҥа флагштоктары ууруохтара, улахан светоид экран туруоруллуоҕа. Баһылык сүрүн болҕомтону дьаама өрөмүөнүгэр уурарга соруйда. Биллэрин курдук, Хабаров, Богатырев уулуссаларынан үгэс курдук Кыайыы параада, Өлбүт үйэлээх полк ааһыахтара. Маны сэргэ, «Якутскдорстрой» салайааччыта Александр Егоров иһитиннэрбитинэн, сүрүн сценаҕа пандус оҥоһуллуоҕа.

Промышленнай уокурук управатын салайааччыта Семен Иванов иһитиннэрбитинэн, бу күннэргэ Федор Попов аатынан сквергэ сахаттан бастакы Сэбиэскэй Сойуус Дьоруойа Федор Кузьмич Попов пааматынньыгар постамент оҥоһулла сылдьар. Оттон пааматынньыгы бэйэтин туруоруу биир-икки күнү ылыаҕа. Дьоруой аатын сүгэр сквергэ тупсарыы үлэтэ ыытыллар. Федор Поповка аналлаах пааматынньыгы үөрүүлээхтик арыйыы ыам ыйын 8 күнүгэр күнүс 12.00 ч. былааннанар. 
Кыайыы пааркатыгар сабыылаах сцена оҥоһуллар. Ол аттынааҕы тутууга музей тэрийэри былаанныыллар. Паарканы кыйа кэтээн көрүү камераларын ыйыыллар. Тэрээһиннэр буолар кэмнэригэр көһө сылдьар туалеттары туруоруохтара. Кэлин манна стационарнай туалет баар буолуоҕа. «Якутскэнерго» тэрилтэни кытта дуогабар быһыытынан аны күһүҥҥэ диэри сырдатыы боппуруоһа быһаарыллыаҕа.
Бэлиэтээн эттэххэ, Кыайыы паарката аны икки сылынан силигин ситиэҕэ. 

Ыам ыйын 7 күнүгэр манна сарсыарда 10.00 ч. сибэкки дьөрбөтүн ууруу кэнниттэн арка уонна триптих арыллыахтара. Ол кэннэ, 11.30 ч., 1942-1945 сс. 122-миллиметровай гаубица биир артиллерийскай расчетугар сулууспалаан баран, бэһиэн тыыннаах эргиллибит бырааттыы Соколовтарга аналлаах мемориальнай дуосканы арыйыы ыытыллыаҕа, диэн иһитиннэрэр Олохтоох дьаһалта пресс-сулууспата.