Евгений Григорьев илиититтэн РФ гражданинын туоһулуур пааспардары туттулар

Бу - оскуола үөрэнээччилэрэ, үөрэххэ, спорка улахан ситиһиилээх, араас олимпиадалар кыайыылаахтара, уопсастыбаннай олоххо көхтөөх оҕолор.

Бэйэтин эҕэрдэ тылыгар Евгений Григорьев Саха сирин уһулуччулаах уопсастыбаннай-политическай диэйэтэллэрэ Максим Аммосов, Былатыан Ойуунускай, Исидор Барахов, Степан Васильев, Степан Аржаков, о.д.а. өрөспүүбүлүкэ төрүттэниитигэр уонна сайдыытыгар киллэрбит сүҥкэн кылааттарын этэн ааста. 

“Кинилэр үлэлэрэ барыта РСФСР иһинэн автономнай өрөспүүбүлүкэни олохтуурга туһуламмыта. Бу бырааһынньык суолтата баараҕай уонна сыаналаммат”, - диэн Евгений Григорьев бэлиэтээтэ.

Итиэннэ үүнэр көлүөнэ төрүттэрин, өрөспүүбүлүкэтин историятын билиэхтээҕин, өйдүү сылдьыахтааҕын тоһоҕолоото.

Салгыы баһылык Саха сирин бастакы бэрэсидьиэнэ Михаил Ефимович Николаев ураты оруолун, өрөспүүбүлүкэ социальнай-экономическай сайдыытыгар уонна 1992 сыл муус устар ыйыгар өрөспүүбүлүкэ саҥа Төрүт Сокуонун ылыныыга улахан кылаатын бэлиэтээтэ.