Евгений Григорьев хапытаалынай өрөмүөн эбийиэктэринэн көһө сылдьар мунньаҕы ыытта

Бастакы эбийиэгинэн «Олох инфраструктура» национальнай бырайыак чэрчитинэн ыытыллар Ефимов, Хабаров, Чернышевскай уонна Ярославскай уулуссалар быһа охсуһууларын хапытаалынай өрөмүөнэ буолла. Эбийиэккэ «РИК Автодор» бэдэрээттэһэр тэрилтэ үлэлиир. Билигин кинилэр Хабаров уонна Ярославскай уулуссаларга үлэни саҕалаатылар.

Иккис эбийиэк – «Гимеин» эргиириттэн Сэргэлээх шоссетын 8 км диэри суолга ыытыллар хапытаалынай өрөмүөн. Билигин бу эбийиэккэ «Главстрой» МКУ технадзорун үлэһиттэрэ булбут итэҕэстэрин кэнниттэн, «Дороги-Саха» ААУо бэдэрээттэһэр тэрилтэ суол аспаалын бүрүөһүнүн уларытыы үлэтин ыытар.

Салгыы баһылык Киров уул., 7/3 уонна 7/4, Ленин пр., 38 тиэргэннэрин уонна Таалай күөлгэ «Обнаженные сердца» искибиэр хапытаалынай өрөмүөнүн хаамыытын көрдө.

Түмүккэ Хатыҥ Үрэх суолугар дьаамалары өрөмүөннээһин үлэтин бэрэбиэркэлээтилэр.

Евгений Григорьев бэлиэтээбитинэн, билигин Ефимов уулуссатын тутуу уонна Ефимов, Хабаров, Чернышевскай уонна Ярославскай уулуссалар быһа охсуһууларын саҥардыы үлэлэрэ улахан кээмэйинэн ыытыллаллар.

«Бэс ыйын ортотуттан Ярославскай уулуссаны аспааллааһын саҕаланыаҕа, быһа охсуһуу толору үлэтэ балаҕан ыйын 1 күнүгэр диэри бүтүөҕэ, 203-с түөлбэҕэ баар социальнай эбийиэктэргэ элбэх тырааныспар сырыытын хааччыйар туһугар», — диэн Евгений Григорьев эттэ.