Евгений Григорьев гражданнары кытта тус көрүстэ

СВО кыттыылааҕын ийэтэ Надежда К. Дьокуускайга сир учаастагын ылыыга уочаракка туруу туһунан ыйыталаста. Кини уола СВО-ҕа өр кэмҥэ сулууспалыыр, ол гынан баран кинилэри уочаракка туруорбатахтар. Дьахтар суукка үҥсүбүт, онуоха суут олорор сири бигэргэтэр докумуон суоҕунан аккаастаабыт. Евгений Григорьев ийэни иһиттэ, баар докумуоннары көрдө уонна уола СВО-ҕа барыан иннинэ Дьокуускайга олорбутун туоһулуур үөрэҕиттэн уонна үлэтиттэн ылыллыбыт ыспыраапкалары дьыалаҕа сыһыарарыгар уонна хаттаан суукка үҥсэригэр сүбэлээтэ.

Дьокуускай олохтооҕо Иван У. сир учаастагын докумуоннатыы туһунан ыйытта. Кини элбэх оҕолоох аҥаардас аҕа уонна СВО кыттыылааҕа. СВО-ҕа барыан иннинэ сир учаастагын атыыласпыт уонна онно дьиэ туттубут, оҕолорун кытта онно олорор, ол гынан баран Росреестрга учаастагы регистрациялыыр кыаҕа суох, тоҕо диэтэххэ сири туһаныы көҥүлүн көрүҥэ икки өрүттээх эбит.

Көрсүһүү кэмигэр Куорат баһылыга Дьокуускайдааҕы Архитектура уонна куораты былааннааһын сүрүн управлениетын салалтатыгар эрийэн, бу уустук боппуруоһу сокуон иһинэн быһаарарга уонна наадалаах көмөнү оҥорорго сорудахтаата.

Санатан эттэххэ, баһылыгы кытта тус көрсүһүү эрдэттэн суруйтарыынан ыытыллар. Дьокуускай куораттааҕы Олохтоох дьаһалтаҕа “Гражданнар уонна тэрилтэлэр сайабылыанньаларын отделыгар” суругунан ыытыахха наада. Сайабылыанньаҕа ыйытыыны сиһилии суруйуу, ону сэргэ (баар буоллаҕына) ыйыллыбыт боппуруоһунан ханна, хаһан тиийэ сылдьыбыт туһунан иһитиннэрии киириэхтээх. Ааккытын-суолгутун, мобильнай эбэтэр стационарнай төлөпүөн нүөмэрин, электроннай почта аадырыһын эбэтэр почтаҕыт аадырыһын ыйыахтааххыт.

Сайабылыанньаны маннык ньыманан ыытыахха сөп:

- почта аадырыһыгар: Дьокуускай к., Ленин проспега, 15;

- Ленин проспега, 15 аадырыска, 109 кабинекка (үлэ күннэригэр 09:00-тан 18:00 диэри, тохтобула 13:00-14:00) илдьэн биэриэххэ сөп.

Тус көрсүһүүнү ыытыы туһунан 40-80-76 нүөмэргэ эрийэн билсиэххитин сөп.