Евгений Григорьев гражданнар кыһалҕаларын иһиттэ

Баһылык Евгений Григорьев уочараттаах тус приемугар куорат олохтоохторо сир, олорор дьиэ, уулусса уотун уо.д.а. кыһалҕаларын киирэ сырыттылар. 
Анал байыаннай дьайыы кыттыылааҕын ийэтэ Людмила Ф. хаарбах дьиэттэн көһөрүү боппуруоһунан киирэ сырытта. Куорат баһылыга Евгений Григорьев Ийэ дойдуну көмүскүү сылдьар буойуттарга өйөбүл бастакы уочарат оҥоһулларын тоһоҕолоото, итиэннэ чугастааҕы кэмҥэ кинилэргэ сир учаастактарын биэрии саҕаланаары турарын эбэн эттэ.
Авиация бэтэрээнэ Валерий П. бас билиигэ ыла сатыыр сирин докуомунугар оҥоһуллубут сыыһаны-халтыны көннөрүү элбэх күнү-дьылы бараабытын этиннэ. Куорат баһылыга Быраап департаменыгар бэтэрээҥҥэ көмөлөһөргө сорудахтаата. 
Элбэх оҕолоох дьиэ кэргэн аатыттан Анна П. Хомустаах уулуссаҕа уот суоҕун үҥүстэ. Евгений Григорьев «Сырдык киин куорат» муниципальнай бырагырамааҕа сайаапка биэрэргэ сүбэлээтэ. 
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).