Евгений Григорьев Глобальнай үөрэхтээһин оскуолатын төрөппүттэрин кытта бу нэдиэлэҕэ көрсүөҕэ

Санатар буоллахха, 203-с түөлбэҕэ үлэлиир Глобальнай үөрэхтээһин оскуолатыгар быйылгыттан 4 мэндиэмэннээх, 3,5 тыһ. кв/миэтэрэ кэриҥэ иэннээх эбии куорпус тутуллар. Бүгүҥҥү күҥҥэ манна 360 миэстэҕэ 1500 курдук оҕо үөрэнэр.

Оскуолаҕа миэстэ тиийбэтин быһаарар сыалтан уонна РНС (РНС – хапытаалынай тутууну ыытыы сокуоҥҥа сөп түбэһэрин, градостроительнай нуормаҕа, ирдэбилгэ эппиэттиирин кэрэһилиир официальнай докумуон) ылыы кыалларын туһугар, Дьокуускай куорат Олохтоох дьаһалтата дьиэ тутааччылартан «инфраструктураҕа хомуур» диэни киллэрбитэ. Судургутук быһаардахха, сорох дьиэ тутар тэрилтэлэр (застройщик) тутуу ыытар көҥүлү (РНС) кыайан ылбакка олороллор. Ол тутуу хаамыытын бытаардар. Оттон РНС ылбакка олорор төрүөттэрэ – тутуохтаах эбийиэктэрэ кэлим былаанынан буолбакка, биирдиилээн түстэнэр («точечнай») тутуу быһыытынан ыытыллыахтаахтара.

Быһата, үөрэх эбийиэктэринэн хааччыллыбатах оройуоннарга олорор дьиэни тутууга РНС бэриллибэт.

«Инфраструктараҕа хомуур» сыаната 1 кв/м иһин 3000 солк. быһыллыбыта. Бу саас мээрийэ 12 тутааччыны кытта уопсайа 682 мөл. солк. кээмэйдээх сөбүлэҥи түһэрсибитин уонна киирбит харчыны бастатан туран Глобальнай үөрэхтээһин оскуолатыгар (ЦГО) эбии куорпуһу тутарга ыытар туһунан быһаарыыны ылыммытын иһитиннэрбитэ. Оттон Куорат дуумата ити сууманы сылларынан үллэрбитэ:

2026 – 215 мөл.солк.

2027 – 332 мөл.солк.

2028 – 117 мөл.солк.