Евгений Григорьев Дьокусукайдааҕы кэлиэп кэмбинээтин иннигэр отчуоттаата

Дьокуускай куорат «Килбиэннээх үлэ куората» үрдүк ааты ыларыгар Дьокуускайдааҕы килиэп кэмбинээтэ сүҥкэн үтүөлээх. 
Бу күннэргэ куорат баһылыга Евгений Григорьев «Дьокуускайдааҕы килиэп кэмбинээтэ» АУо гендириэктэрэ Светлана Кынакытованы кытта үөрүүлээх быһыыга-майгыга тэрилтэ дьиэтин таһыгар Аҕа дойду Улуу сэриитин сылларыгар килбиэннээхтик үлэлээбитин туоһулуур мемориальнай дуосканы арыйдылар.
Бу сэмэй дуоска 85 сыл анараа өттүгэр тэриллибит килиэн оҥорор кэмбинээт сэрии аас-туор сылларыгар тыын суолталаах кыһалҕаны быһааран кэлбитин кэрэһитэ буолла.
Евгений Григорьев тэрилтэ кэлэктиибин кытта көрсүһүүгэ Дьокуускай куорат демографията тупсан иһэрин, саахалланар туруктаах дьиэттэн көһөрүү, социальнай эбийиэктэри тутуу хаамыытын, суол тутуутун туһунан, уопсастыбаннай тырааныстары саҥардыыны, дьэллик ыттары утары үлэни, арыгыны утары политиканы, быһата, дьаһалта ааспыт биэс сылга ханнык хайысхаларынан үлэлээн кэлбитин сиһилии иһитиннэрдэ. 
Арыгыны утары үлэҕэ сыһыаннаан кэпсэтии кыттыылаахтарын ортотугар ыытыллыбыт ыйытык Олохтоох дьаһалта бу хайысхаҕа политикатын көрсүһүү кыттыылаахтарын 90% өйүүрүн көрдөрдө. 
Отчуот кэнниттэн кэмбинээт үлэһиттэрэ баһылыктан Тургенев уулуссатын көҕөрдүү былаанын, уулуссалартан кумаҕы хомуйуу, 19№-дээх оптуобус маршрутугар уларытыыылары киллэрии, бөх быраҕар баахтары туруоруу, уулуссалары сырдатыы, Федор Попов уулуссатыттан арыгы маҕаһыынын суох оҥоруу туһунан ыйыталастылар. Киирбит ыйытыылар бары боротокуолга тиһилиннилэр.
Кэмбинээт генеральнай дириэктэрэ Светлана Кынакытова баһылык Евгений Григорьевка тэрилтэ иннигэр кэлэн ыытыллыбыт үлэ сүнньүнэн иһитиннэрии оҥорбутун иһин махталын биллэрдэ. «Куораты сайыннарыы былаанын үөрэ иһиттим уонна ону бэйэбит тэрилтэбитигэр туһаныахпыт диэн санаалаахпын. Ыйытыылары биэрэр кыах үөскээбитигэр махтанабын. Күөрэйэр кыһалҕалар быһаарыллыан иһиэхтэрэ диэн эрэнэбин», – диэтэ гендириэктэр.
Дьокуускайдааҕы килиэп оҥорор кэмбинэт үлэһитэ Ирина А. бэйэтин харда тылыгар Олохтоох дьаһалта ааспыт биэс сыллаах үлэтин туһунан сөҕө истибитин, куорат кэлиҥҥи сылларга чахчы лаппа тупсан эрэрин бэлиэтээтэ.  
Өр сыллаах үтүө суобастаах үлэлэрин, куорат социальнай-экономическай сайдыытыгар кылааттарын иһин уонна Тыа хаһаайыстыбатын үлэһиттэрин күнүнэн Олохтоох дьаһалта Махтал суруктарынан Анджела Балахонова, «Яхлеб» маҕаһыын атыыһыта, Юлия Гармаева, бытархай атыы сыаҕын маастар-биэкэрэ, уонна Виктория Ямщикова, туорт оҥорор сыах кондитера, наҕараадаланнылар, диэн Олохтоох дьаһалта пресс-сулууспата иһитиннэрэр.