Евгений Григорьев аһаҕас уруогу ыытта

Куорат баһылыга Евгений Григорьев муус устар 19 күнүгэр 31-с №-дээх орто оскуола үрдүкү кылааһын үөрэнээччилэригэр обществознаниеҕа аһаҕас уруогу ыытта. Аһаҕас уруок муус устар  21 күнүгэр бэлиэтэнэр Олохтоох бэйэни салайыныы күнүгэр ананна. Бу туһунан Олохтоох дьаһалта пресс-сулууспата иһитиннэрдэ.
Евгений Григорьев Дьокуускай куораты холобурдаан туран, оҕолорго олохтоох бэйэни салайыныы диэн тугун, олохтоох бэйэни салайыныы уорганнара туох боломуочуйалаахтарын, куорат баһылыга тугунан дьарыктанарын тиийимтиэтик өйдөттө. Көрсүһүү сыыйа формальнайа суох кэпсэтиигэ кубулуйан, үөрэнээччилэр куорат баһылыгыттан оскуолатааҕы сылларын, ону сэргэ куораты тупсарыы, оптуобус пааркатын саҥардыы, социальнай ситимнэр тустарынан ыйыталастылар. 
Кэпсэтии кэмигэр Евгений Григорьев оскуолаҕа үөрэнии – инники өттүгэр ситиһиилээх үөрэх сүрүн олуга буоларын бэлиэтээтэ. 
«Оскуоланы бүтэрдэххитинэ эһиги иннигитигэр араас суоллар арыллыахтара. Саамай кылаабынайа – бэйэҕит күүскүтүгэр, олоххо ситиһиилээх  буоларгытыгар эрэниэхтээххит», - диэтэ Евгений Григорьев.   
Кини этэринэн, ситиһии кистэлэҥэ – туруоруммут сыалы хайаан даҕаны ситиһэргэ уонна дьиссипилиинэҕэ. 
«Үрдүк чыпчааллары дабайар ыра санааланыҥ, ону олоххут сыала оҥостуҥ. Сыалы ситиһэргэ чопчу соруктары уонна болдьохтору туруоруҥ, итини ситиһэргэ күннээҕи үлэҕитин саҕалааҥ», - диэн түмүктээтэ куорат баһылыга.
Муус устар 8 күнүттэн 22-гэр диэри  Олохтоох бэйэни салайыныы күнүгэр анаммыт тэрээһиннэр ыытыллаллар. Ол иһигэр оскуолаларга кылаас чаастара, үөрүүлээх линейкалар, аһаҕас уруоктар, уруһуй, өйтөн суруйуу, ааҕыы куонкурустара, интеллектуальнай уонна дьыалабыай оонньуулар, библиотекаларга кинигэ быыстапкалара, информационнай чаастар, хаартысканан быыстапкалар уо.д.а. буолаллар.