Евгений Григорьев доруобуйа харыстабылын үлэһиттэрин иннигэр отчуоттаата

Олунньу 17 күнүгэр куорат баһылыга Евгений Григорьев М.Е. Николаев аатынан Медицина национальнай киинин дьиэтигэр доруобуйа харыстабылын үлэһиттэрин иннигэр отчуоттаата. 
Баһылык ааспыт 2024 сылга Дьокуускай куоракка дойду баһылыга Владимир Путин өйөбүлүнэн олоххо киирбит маастар-былаан бастакы бырайыактара оҥоһуллубуттарын бэлиэтээтэ – Ленин болуоссатын реконструкцията, Р.М. Дмитриев аатынан уонна Сайсары эбэ кытыллара. 2030 сылга диэри уопсайа 90 бырайыак былааннаммытыттан бүгүҥҥү күҥҥэ 23 бырайыак үлэҕэ сылдьар. 
Арассыыйаҕа биллэриллибит Аҕа дойдуну араҥаччылааччы, Саха Өрөспүүбүлүкэтигэр буола турар Ийэ дойдуну көмүскээччи сылларынан, итини сэргэ Улуу Кыайыы 80 сылынан Дьокуускай куоракка буола турар уонна былааннаах тэрээһиннэри билиһиннэрдэ.
Евгений Григорьев доруобуйа харыстабылын үлэһиттэригэр демография хайысхатыгар үрдээһин бэлиэтэммитин иһитиннэрдэ – 2024 сылга 4 тыһыынчаттан тахса оҕо төрөөбүтүн, 2023 сыллааҕы көрдөрүүнэн киин куорат нэһилиэнньэтин орто сааһа 35-кэ тэҥнэһэрин, 2019 сылтан нэһилиэнньэбит уопсай ахсаана 50 тыһыынчанан эбиллибитин.

Баһылык маны сэргэ куорат бүддьүөтүн, нацбырайыактары, уопсастыбаннай тырааныспар реформатын олоххо киллэрии хаамыытын, инфраструктураны сайыннарыы, арыгыны утары охсуһуу, элбэх оҕолоохторго, анал байыаннай дьайыы кыттыылаахтарыгар оҥоһуллар о.д.а. социальнай өйөбүл миэрэлэрин туһунан кэпсээтэ.
Доруобуйа харыстабылын эйгэтин үлэһиттэрин өттүттэн оптуобустар сырыыларын, «Сатал» түөлбэ дьиэлэрин ИЖС категорияҕа көһөрүү, перинатальнай балыыһа таһыгар бөх тоҕор сирдэри туруоруу, олорор дьиэлэр тастарыгар арыгы атыылыыр маҕаһыыннары суох гыныы, элбэх оҕолоохторго уонна анал байыаннай дьайыы кыттыылаахтарыгар учаастактары биэрии болдьохторун о.д.а. туһунан ыйытыылар киирдилэр, диэн Олохтоох дьаһалта пресс-сулууспата иһитиннэрэр.