Эттэн сонун уонна судургутук астанар бүлүүдэлэр

Билигин хас биирдии ыалга эт дэлэй кэмэ. Бүгүҥҥү нүөмэрбитигэр эт эгэлгэтиттэн сонун уонна судургутук астанар бүлүүдэлэр ырысыаптарын бэлэмнээтибит.
Лаваш сыттыктаах сибиинньэ этэ
Туох наадата:
- сибиинньэ этэ – 400 г;
- чараас лаваш (көнө муннуктаах икки лиис) – 200 г;
- сымыыт – 1 уст.;
- орто кээмэйдээх моркуоп – 1 уст.;
- эриэппэ луук – 1 уст.;
- кытаанах сыыр – 100 г;
- туус, биэрэс – бэйэ сөбүлүүрүнэн.
Астааһына:
Эти чараас гына бысталыыбыт, куһуоктарын икки өттүттэн куукунаҕа туттуллар сүгэнэн сынньабыт. Туустуубут, биэрэстиибит.
Луугу уонна моркуобу ыраастаан, бэйэ сөбүлүүрүнэн кырбыыбыт уонна хобордооххо орто уокка ыһаарылыыбыт. Сыыры түөркэлиибит.
Духуопка лииһин мас арыытынан сотон баран лавашпытын тэлгиибит. Үрдүгэр моркуоптаах луукпутунан тэҥ араҥа оҥоробут. Салгыы эти уурабыт уонна үрдүгэр түөркэлэммит сыыры кутабыт, онтон иккис лавашпытынан бүрүйэбит. Лаваш үрдүн сиикэй сымыытынан сыбыыбыт. Онтон төкүнүктүү кырбаммыт помидору, ыһаарыламмыт тэллэйи эбиэххэ сөп.
180 кыраадыс итии духуопкаҕа быһа холоон 45 мүн. буһарабыт. Буһуон 10 мүн. иннинэ өссө биирдэ түөркэлэммит сыыры, бытархай гына кырбаммыт укуруобу табыгынатыахха сөп. Эт буспутун-суоҕун быһан көрөн быһаарыллар.
«Гусарскай» салаат
Туох наадата:
- ынах куҥ этэ – 250 г;
- помидор – 200 г;
- кытаанах сыыр – 50 г;
- петрушка – 10 г;
- чеснок – 1 тиис;
- мас арыыта – 2 ост. нь.;
- майонез – 2 ост. нь.;
- туус, биэрэс – бэйэ сөбүлүүрүнэн.
Астааһына:
Эти туустаан, биэрэстээн тумалыыбыт, мас арыытынан сотобут уонна фольгаҕа суулуубут. Тимир лиискэ ууран, 180 кыраадыс итии духуопкаҕа 40 мүн. буһарабыт. Сойбутун кэннэ соломолуу кырбыыбыт, помидору сууйан баран эмиэ оннук бысталыыбыт. Сыыры бөдөҥ түөркэҕэ анньабыт. Петрушканы сууйан, куурдан бытархай гына кырбыыбыт, чесногу илдьиритэбит. Онтон барытын иһиккэ холбоон кутабыт, майонезтаан баран булкуйабыт.
Эриллибит эттээх токуркай
Туох наадата:
- токуркай (бублик) – 150 г;
- үүт – биир ыстакаан;
- эриллибит эт (сибиинньэ, ынах, куурусса да буолуон сөп) – 200 г;
- эриэппэ луук (орто) – 1 уст.;
- сымыыт – 1 уст.;
- кытаанах сыыр – 50 г;
- мас арыыта (духуопка лииһин соторго) – 1 ост. нь;
- туус, биэрэс – бэйэ сөбүлүүрүнэн.
Астааһына:
Дириҥ иһиккэ сылаас үүтү кутан, онно токуркайдары быһа холоон 10-15 мүн. (кээмэйиттэн уонна халыҥыттан тутулуктаах) илитэ уурабыт, икки өттүттэн сымныырын курдук, эргитэн биэрэбит. Хааһы буолуор диэри өр сытыарыллыбат.
Бу кэмҥэ начыынын бэлэмниибит. Эриэппэ луугу ыраастаан, бытархай гына түөркэлиибит эбэтэр кырбыыбыт. Онтон эриллибит эккэ кутан холбуубут, сымыыт кутабыт, туустуубут, биэрэстиибит. Эриллибит эт биир кэлим маасса буолуор диэри үчүгэйдик булкуйабыт. Сыыры түөркэлиибит.
Духуопка лииһин мас арыытынан сотобут. Токуркайдары бэйэ-бэйэлэриттэн тэйиччи соҕус уурталыыбыт, ортолоругар эриллибит эти симэбит. Үрдүгэр сыыры кутабыт. 180 кыраадыс итии духуопкаҕа начыына буһуор диэри, быһа холоон 25-30 мүн. туруорабыт.
Духуопкаттан буһан таҕыстаҕына, бүлүүдэбитин күөх салаатынан, петрушканан эбэтэр атын күөх үүнээйинэн киэргэтэбит. Остуолга оҕуруот аһын, соуһу кытта ууруохха сөп.
Ананастаах сибиинньэ этэ
Туох наадата:
- сибиинньэ куҥ этэ – 450 г;
- кэнсиэрбэлэммит ананас – 300 г;
- ананас суога (бааҥкаттан кутабыт) – 100 мл;
- хортуоппуй эбэтэр кукуруза крахмала – 2 ост. нь.;
- томат соуһа (эбэтэр паастата) – 2 ост.нь.;
- мас арыыта – 2 ост. нь.;
- петрушка эбэтэр күөх луук – киэргэтиигэ;
- соевай соус – 2 ост. нь.
Астааһына:
Эти кумааҕы сотторго ууран, куурдабыт, онтон бөдөҥ соҕус гына кырбыыбыт, крахмал эбэбит уонна үчүгэйдик булкуйабыт. Итии хобордооххо 3-5 мүн. ыһаарылыыбыт. Туспа хобордооххо ананас суогун кутабыт, онно томат соуһун эбэбит, салгыы – соевай соуһу. Оргутабыт уонна 2 мүн. тэптэрэ түһэбит. Салгыы хобордооххо ыһаарыламмыт сибиинньэ этин эбэбит, орто уокка 10 мүн. туруорабыт, бу кэмҥэ соуһа хойдор. Онтон кэнсиэрбэлэммит ананаһы кутан баран, 5 мүн. хаппахтаан туруорабыт. Ананас соуһу иҥэринэр уонна сымныыр.
Остуолга ууруох иннинэ күөх үүнээйинэн киэргэтиҥ.
Сибиинньэ этиттэн алаадьы
Туох наадата:
- сибиинньэ этэ – 400 г;
- сымыыт – 1 уст.;
- чеснок – 1 тиис;
- эриэппэ луук – 1 уст.;
- сүөгэй – 3 ост. нь.;
- хортуоппуй крахмала – 3 ост. нь.;
- ынах арыыта – 4 ост. нь.;
- туус, биэрэс – бэйэ сөбүлүүрүнэн.
Астааһына:
Эти сытыы быһаҕынан бытархай гына кырбыыбыт, туустуубут, биэрэстиибит, чесногу илдьиритэн эбэбит. Луугу ыраастаан, бытархай гына кырбыыбыт, эти кытта холбоон, үчүгэйдик булкуйабыт. Туспа иһиккэ сымыыты алдьатан, онно сүөгэйи эбэн ытыйабыт уонна эттээх маассаҕа холбуубут, хортуоппуй крахмалын кутабыт уонна биир кэлим буолуор диэри булкуйабыт. Тиэстэбитин 5-7 мүн. туруора түһэбит.
Хобордооххо мас арыытын сылытабыт, онтон ньуосканан алаадьыбытын кутан, эргитэ сылдьан, саһарыар диэри ыһаарылыыбыт. Онтон хобордооҕу ыга хаппахтаан баран, орто уокка 5 мүн. туруоран, паарын көтүтэбит.
«Атыыһыт» салаат
Туох наадата:
- сибиинньэ куҥ этэ – 400 г;
- кэнсиэрбэлэммит күөх горох – 300 г;
- сымыыт – 3 уст.;
- моркуоп – 2 уст.;
- эриэппэ луук – 1 уст.;
- майонез – 2 ост. нь.;
- саахар – 1 ост. нь.;
- уксуус – 1 ост. нь.;
- мас арыыта – 2 ост. нь.;
- туус, биэрэс – бэйэ сөбүлүүрүнэн.
Астааһына:
Бу олус тотоойу уонна минньигэс, бырааһынньык сандалытын киэргэтэр бүлүүдэ. Эти уонна сымыыты эрдэ буһаран, сойутан кэбиһиэххэ сөп, оччоҕуна бэрт түргэнник оҥоһуллар салаат.
Сыата суох куҥ эти талар ордук. Эрдэ буһарар буоллахха, миинигэр сойута хаалларыҥ, симэһиннээх уонна минньигэс буолар. Кэнсиэрбэлэммит горох уутун сүөкүүбүт, дуршлагка кутабыт. Луугу ыраастаан, бытархай гына кырбыыбыт, онно саахар, биир кымаах туус уонна уксуус эбэн, маринад бэлэмниибит, 25-30 мүн. туруора түһэбит. Онтон уксууһун сүөкүүбүт.
Бүтэйдии буспут сымыыты хахтыыбыт, орто гына кырбыыбыт. Моркуобу бөдөҥ харахтаах түөркэҕэ анньабыт, хобордооххо сымныар диэри ыһаарылыыбыт, сойутабыт. Сибиэһэй моркуобу бэйэтинэн да кутуохха сөп.
Иһиккэ маринадтаммыт луугу, гороҕу, сымыыты, эти уонна моркуобу барытын холбуубут. Туус, биэрэс табыгынатабыт, майонеһынан тумалыыбыт уонна булкуйабыт. Остуолга ууруох иннинэ холодильникка туруора түһэр ордук.
Сонуннар
Ордук ааҕаллар


