Эт барахсан

Сааскы кэмҥэ саха киһитин уһун кыһыннааҕы хасааһа биллэ чарааһыыр. Айылҕа тымныытыгар харайа таһаарбыт аспытыттан-үөлбүтүттэн ордон хаалбыта, күн көрүүтэ уһаан, салгыҥҥа былдьатар кутталланар. Инньэ гынан элбэх хаһаастаах этин-аһын морозильникка харайар түбүккэ түһэр. 
Эти хайдах сөпкө уһуннук харайыахха сөбүй? Бу туһунан уонна бэрт сотору халлаан сылыйда да шашлыктыы тахсаары уйуһуйа сылдьааччыларга эти маринуйдуурга судургу эрээри бэрт минньигэс ырысыаптары таһаарабыт.

Эти сөпкө харайыахха

Эт морозильникка төһө өр хаачыстыбатын сүтэрбэккэ харайыллара кээмэйиттэн уонна туох этэ буоларыттан тутулуктаах. Ордук түргэнник убаһа этэ буорту буолар. Сайын эт суоҕар сииргэ сибиэһэйдии убаһа этин хаһаанарга олох эрдэ дьаһаннахха эрэ табыллар. Онно анаан эти салгына суох вакуумнаан баран ууруллар. Ол да үрдүнэн харайыы кэмэ уһуна суох. Ынах, сибиинньэ уонна бараан улахан кырбас этэ сыл кэриҥэ туох да буолбакка сытыахтарын сөп. Оттон соркуойга анаан кыра гына кырбаммыт эт 4 ый эрэ буорту буолбакка харайыллар. Бүтүн көҕүһүнэн тоҥоруллубут куурусса, кус сыл харайыллар буоллаҕына, хол-буут араарыллыбыт көтөр этэ уһаабыта аҕыс ый морозильникка сытыан сөп. Оттон фаршы үс ыйтан ордук кэмҥэ уура сыппат ордук. Тоҥоруллубут улахан кырбас эти ириэрэн баран тута барытын астаабакка ордугун төттөрү тоҥордоххо, туох баар туһалаах микроэлеменнэрэ сүтэр, амтана мөлтүүр эбит. Маны таһынан морозильниктан хостоммут эти аа-дьуо холодильникка ириэрдэххэ, эт ордук симэһиннээх, иҥэмтиэлээх буоларын бэлиэтииллэр.

Шашлык этин бэлэмнииргэ сүбэлэр

Куурусса этин кылгаабыта чаас аҥаара, оттон сибиинньэ, ынах, бараан эттэрин 1-2 чаас маринуйданар. Кытаанах эти, буорту буолаары гыммыты уһуннук маринуйданар. Ыйыллыбыт кэмтэн уһуннук маринадка сыппыт эт туох да буолбат. Сүрүнэ, кылгас кэмҥэ дьиэ сылааһыгар туруоруохха сөп буоллаҕына, уһуннук маринуйдуурга холодильникка угуллар.

Кефиргэ

Эт – 2 кг;

Эриэппэ луук – 1700 г;

Хмель-сунель тума – ост. нь. аҥаара;

Туус, мэлиллибит хара биэрэс – бэйэ сөбүлүүрүнэн;

Кефир – 1700 мл.

Луугу кыра гына кырбаан дириҥ истээх иһиккэ кутабыт, сүмэһинэ тахсарын курдук кыратык ыга баттыыбыт. Туманы барытын кутан булкуйабыт. Манна эппитин уган өссө төгүл үчүгэйдик булкуйабыт. Ол кэннэ кефирбитин кутабыт. Хаппахтаан, ыга баттаан туран, эттээх иһиппитин сахсыйан биэрэбит.

Минеральнай ууга

Эт – 2 кг;

Эриэппэ луук – 500 г;

Мас арыыта – 1 ост. нь.;

Туус, мэлиллибит хара биэрэс – бэйэ сөбүлүүрүнэн;

Шашлыкка анаммыт универсальнай тума – 1 ост. нь. аҥаара;

Чеснок – 5 өлүүскэ;

Газировкалаах минеральнай уу – 1 л.

Эриэппэ луугу синньигэс гына биһилэхтии быһабыт, эппитигэр тарҕата уурабыт. Мас арыытын, тумаларбытын уонна чесногу кутан кичэллээхтик булкуйабыт. Бүтэһигэр минеральнай уубутун саба кутан, эппитин маринуйдата уурабыт.

Мяталаах

Эт – 2 кг;

Шашлык анал тумата – 1 ост. нь. аҥаара;

Туус – бэйэ сөбүлүүрүнэн;

Мята – 3 сүүмэх;

Эриэппэ луук – 500 г.

Эти угуохтаах иһиппит түгэҕэр мятаны табыгынатабыт. Ол үрдүгэр тумаламмыт эппитин биир араҥаны тэлгиибит, үрдүгэр мятаны кутабыт, онтон эмиэ эппитин тэлгээн, бэрээдэгинэн араҥалаан иһиппитин толоробут. Маринуйдуур кэммит бүтүө чаас аҥаара иннинэ тиэрбэстии кырбаммыт луукпутун эбэн булкуйабыт.

Томат утаҕар

Эт – 2 кг;

Эриэппэ луук – 500 г;

Шашлык анал тумата – 1 ост. нь.;

Туус, мэлиллибит хара биэрэс – бэйэ сөбүлүүрүнэн;

Чеснок – 3-5 өлүүскэ;

Томат утаҕа – 500 мл.

Эппитигэр синньигэс гына кырбаммыт луугу, тумалары уонна илдьиритиллибит чесногу холбуубут. Манна томаппыт согун саба кутабыт, хаппахтаан баран маринуйдата уурабыт.

Майонезка

Эт – 2 кг;

Эриэппэ луук – 300 г;

Майонез – 500 мл;

Карри – 1 ост. нь.;

Туус, мэлиллибит хара биэрэс – бэйэ сөбүлүүрүнэн.

Луугу блендеринэн илдьиритэбит. Эппитигэр бу луукпут пюретын кытта туох баар ингредиеннэрбитин холбоон булкуйабыт.

Пиибэҕэ

Эт – 2 кг;

Эриэппэ луук – 500 г;

Чеснок – 3 өлүүскэ;

Мэлиллибит кориандр – 2 ч. нь.;

Паприка – 2 ч. нь.;

Туус, мэлиллибит хара биэрэс – бэйэ сөбүлүүрүнэн;

Хаачыстыбалаах сырдык пиибэ – 750 мл.

Тумаларбытын, специяларбытын эппитин кытта холбуубут, пиибэнэн саба кутан маринуйдата уурабыт.

Лууктаах маринад

Эт – 2 кг;

Эриэппэ луук – 500 г;

Туус – бэйэ сөбүлүүрүнэн;

Мэлиллибит хара биэрэс – бэйэ сөбүлүүрүнэн.

Луугу хас да өлүүскэҕэ кырбаан баран блендеринэн пюре буолуор диэри илдьиритэбит. Эппитин туустаан, биэрэстээн баран луукпут пюретын кутан булкуйабыт. Шашлыгы сырайарга луук кэриэрбэтин туһугар эти үөлүөх иннинэ хас биирдии куһуогу салфетканан оборторор ордук.