Эт араас көрүҥүттэн тотоойу ас

Сүрэхтээх пирог

Эйиэхэ наада:

- ынах сүрэҕэ – 150-200 г;

- кыһыл биэрэс аҥаара;

- эриэппэ луук аҥаара;

- сымыыт уоһаҕа;

- тиэстэ (хайдах баҕарар).

Сүрэҕи, моркуобу, биэрэһи, луугу  барытын тэҥ гына кырбаан бэлэмниибит. Тиэстэни тэнитэн баран корзина курдук оҥоробут, ол иһигэр оҕуруот астаах сүрэҕи кутабыт уонна тиэстэни сымыыт уоһаҕынан биһэн баран 180 кыраадыска тиийэ сылыйбыт духуопкаҕа  30-40 мүнүүтэ буһара түһэбит.

Кус соркуойа

Эйиэхэ наада:

- 1-2 кус этэ;

- туус, тума;

- 6-7 хортуоппуй;

- 2 лавровай лиис;

- 50 г мас арыыта.

Кус этин ыраастаан, туустаан-тумалаан баран арыыга ыһаарылыы уурабыт. Куспут буһарын саҕана хортуоппуйу кубиктыы кырбаан ууга буһарабыт. Буспут куска хортуоппуйу уутун  сүөкээн эбэбит уонна, лавровай лииһи уган, хаппахтаан кэбиһэбит. Плитканы араарабыт уонна аһы сылааска туруора түһэбит.

Лимоннаах куобах

Эйиэхэ наада:

- куобах этэ;

- 1 лимон;

- 1 помидор;

- 1 эриэппэ луук;

- туус, тума;

- укуруоп.

Куобах этин сууйан баран салапаан рукавка угабыт, туустуубут-тумалыыбыт. Помидору – бүтүннүү, луугу – кырбаан, лимону ортотунан быһан угабыт уонна сэрэнэн  булкуйабыт. Рукавы баайан баран духуопкаҕа 200С  кыраадыс сылааска 35-40 мүнүүтэ буһарабыт.

Эттээх кекс

Тиэстэтигэр:

-1 ыст. үүт;

- 1 сымыыт;

- 2-3 ыст. бурдук;

- туус.

Начыыныгар:

- 300 г куурусса этэ;

- 50 г рис;

- 1 моркуоп;

- 1 эриэппэ луук;

- 100 г сыыр;

- туус, тума.

Бастакынан риһи ууга буһаран бэлэмниибит. Куурусса этин оҕуруот астаан, сыырдаан ыһаарылыыбыт уонна онно буспут риһи кутан бииргэ булкуйабыт. Тиэстэ оҥорон баран кекс иһитигэр кээмэйдээн тэнитэбит. Начыыммыт сойбутун кэннэ, тиэстэ үрдүгэр кутабыт уонна сэрэнэн сабабыт. 180 С  кыраадыстаах сылаас духуопкаҕа 40 мүнүүтэ буһарабыт.

Начыыннаах шарик

Эйиэхэ наада:

- 300 г рис;

- сибиэһэй оҕурсуу аҥаара;

- 150 г творожнай сыыр эбэтэр сүөгэй, майонез;

Соуска:

- 1 уст. эриэппэ луук;

- 100 г тоҥ отон;

- туус, тума.

Риһи ууга буһаран бэлэмниибит. Оҕурсуну кып-кыра кубик гына бысталыыбыт уонна творожнай  сыыры кытта булкуйабыт.

Риһи шарик курдук төкүнүтэбит, ортотугар сыырдаах оҕурсуну ууран баран саба баттаан, төгүрүгү оҥоробут. Бу ас гарнир эбэтэр туспа бүлүүдэ курдук сиэниэн сөп.

Сахалыы пицца

Эйиэхэ наада:

- 200 г эриллибит эт;

- 1 уст. сымыыт;

- туус, тума;

- сыыр, помидор, оливка.

Эриллибит эти туустаан, тумалаан баран сымыыты кытта булкуйабыт уонна духуопка лииһигэр  төгүрүччү тэлгээн уурабыт.

180С  кыраадыстаах итиигэ  30 мүнүүтэ  буһарабыт, буһуо 5 мүнүүтэ иннинэ түөркэлэммит сыыры, помидору, оливканы  ууран киэргэтэбит.

Суоракка буспут эт

Эйиэхэ наада:

- убаһа этэ;

- 500 г суорат эбэтэр маҕаһыын кефирэ;

- кетчуп, хартыыһа.

Буһарыах иннинэ киэһэ эти кетчубунан, хартыыһанан биһэн баран суоратынан кутан сөрүүҥҥэ хонноробут.

Сарсыныгар эти духуопка иһитигэр  ууран, фольганан бүрүйэн баран, 180С кыраадыстаах итиигэ 30 мүнүүтэ фольгалаах, 10 мүнүүтэ фольгата суох буһара уурабыт.

Ананастаах эт

Эйиэхэ наада:

- эт;

- ананас;

Эти кэнсиэрбэлэммит ананаһы кытта бииргэ хонноробут. Сарсыныгар духуопкаҕа 180С  кыраадыстаах сылааска  30-40 мүнүүтэ буһарабыт. Буспутун кэннэ  мас шпажкаларга анньан, шашлык курдук киэргэтэн уурабыт.

Хортуоппуйдаах булочка

Эйиэхэ наада:

- 5 уст. орто кээмэйдээх хортуоппуй;

- 25 г доруоһа;

- 1 уст. сымыыт;

- 125 мл сылаас уу;

- 100 г ынах арыыта;

- 1 ост. нь. сүөгэй;

- 1/5 ч. нь. туус;

- 2 ост. нь. саахар;

- 400 г бурдук.

Маҥнай хортуоппуйу ууга буһаран пюре оҥорон бэлэмниибит. Онтон сылаас ууга саахары, тууһу, доруоһаны кутан булкуйабыт, онно  100 г бурдук эбэбит. Маннык 20-чэ мүн. үлүннэрэ уурабыт.

Сымнаҕас үлүннэриилээх тиэстэ бэлэм буолбутун кэннэ сымнаабыт арыыны, сымыыты, сүөгэйи кутан бииргэ булкуйабыт, бурдукпут ордугун кутан, биир кэлимсэ буолуор диэри мэһийэбит. Онтон сылаас сиргэ чаас курдук эмиэ үлүннэрэ уурабыт. Тиэстэни куурусса сымыытын саҕа кээмэйдээх куһуоктарга бысталыыбыт, төкүнүтэн баран ортотугар хортуоппуй пюретын уурабыт. Духуопка лииһигэр сааһылаан  ууран баран, буулкаларбытын сүөгэйинэн эбэтэр сымыыт уоһаҕынан биһэбит. 180С  кыраадыстаах сылааска буһарабыт. Буспутун кэннэ сылаастыы ынах арыытынан биһиэххэ сөп.